2025 жылдың жазғы маусымында «Жолаушылар тасымалы» АҚ пойыздарымен 4 миллионнан астам жолаушы жолға шықты.
Бұл туралы компанияның баспасөз қызметі хабарлады.
Ең жоғары сұранысқа ие бағыттар – Астана, Алматы, Шымкент, Семей, Ақтөбе, Түркістан және Алакөл. Маусымдық жүктемені қамтамасыз ету үшін 13 қосымша пойыз іске қосылды. Алакөл бағытында арнайы пойыздар Астана, Алматы, Семей, Өскемен, Қызылорда және Павлодар қалаларынан қатынады.
Жаздағы маңызды жаңалықтардың бірі – «Burabay Express» электр пойызының іске қосылуы болды. №888/887 пойызы Астана мен Бурабай курорты арасында қатынайды. Алты вагоннан тұратын құрамда үш түрлі қызмет көрсету класы қарастырылған: бірінші, «комфорт-плюс» және стандарт. Бұл – Қазақстанда алғаш рет Starlink жоғары жылдамдықты интернетімен жабдықталған жолаушылар пойызы.
Сонымен қатар, вагон паркін жаңарту жұмыстары жалғасуда. Тамыз айында халықаралық Алматы-Саратов бағытына 30 жаңа вагоннан құралған пойыз жолға шықты.
Жыл басынан бері 352 мың мүмкіндігі шектеулі жолаушы және 1,2 миллионнан астам бала тасымалданған.
ҚТЖ өкілдерінің айтуынша, алдағы уақытта да жолаушылар үшін жайлы әрі қауіпсіз тасымал ұйымдастыру жұмыстары жалғаса береді.
