Атырауда екі апта бұрын 7 жастағы жеткіншек саусағынан айырылды, — деп хабарлайды Massaget.kz тілшісі "Седьмой канал" арнасына сілтеме жасап .
Телеарна мәліметінше, мектеп ауласындағы алаң мүлдем қоршалмаған, тіпті қауіпсіздік те қарастырылмаған.
"Қызым мына жердегі құрылғыға қолын қысып алды. Екі саусағын ауыртқан. Бір қолының саусағы жоқ. Екіншісінің саусағы терісіне ілініп тұрады. Дәрігерлер тігуге келмейтінін айтады. Мына жерде ешқандай қоршау жоқ. Соқалар құлайын деп тұр", — дейді қала тұрғыны Нұргүл Тәкенова.
Спорттық алаңдар қаладағы екі бірдей оқу ордасында орнатылған.
"Мемлекеттік мектеп болған соң әкімдіктің атынан жасалатын нәрсе. Өзіміз орнатпаймыз. Біздің балансқа берілген жоқ. Барлығы қалай берілді, солай тұрды. Біздің балансқа кірмейді деп нақты айта аламын", — дейді мектеп директоры Жанна Құлбаттырова.
Жалпы қала бойынша биыл 100-ден аса ойын алаңы мен спорттық жаттығу орны орнатылады.
"Оған жергілікті бюджеттен 700 миллион теңге қарастырылған. Бірақ қауіпсіздік пен қоршау жобада қарастырылмаған", — дейді жауапты мамандар.
"Салынған спорт, ойын алаңдарының кепілдік мерзімі бар. Жоба бойынша ешқандай ойын алаңдары немесе спорт алаңдары қоршалмайды. Спорттық жаттығу алаңдары 2019 жылы қалалық құрылыс бөлімінің тапсырысы бойынша орнатылған", — дейді қала әкімінің баспасөз хатшысы Ғасырбек Төлеген.
Ал тұрғындар "сапасыз әткеншектер мен сырғанақтар балалардың өміріне қауіп төндіре ме?" деп алаңдайды.
Өзекті жаңалықтарды өз уақытында оқу үшін Facebook парақшамызға жазылыңыз!
