Францияда үкіметке қарсы жаппай наразылық шеруі өтіп жатыр. Халық биліктің келер жылғы бюджетке қатысты үнемдеу жоспарына қарсы.
Ереуілге жүздеген мың адам қатысуда. Шеруден қалаларда қоғамдық көлік қозғалысы қиындады.
18 қыркүйек Францияда ауқымды демонстрациялар күніне айналды. Бұл «Барлығын бұғаттаймыз!» қозғалысының екінші кезеңі. Соңғы рет мұндай ірі шеру 2023 жылы, зейнетақы реформасына наразылық кезінде болған еді. Қазіргі толқу Парижден бастап Лион, Марсель, Тулуза, Ницца, Ренн сияқты ірі қалалардың бәрін қамтыған. Жалпы көшеге 800 мыңнан астам адам шыққан.
Наразылық келер жылғы бюджетті үнемдеу шараларына байланысты туындады. Билік 44 млрд еуроға қысқартуды ұсынған. Оны бұрынғы үкімет басшысы Франсуа Байру көтерген еді. Өткен аптада тағайындалған жаңа премьер Себастьян Лекорню мәселені шешу үшін бірнеше шараны кері қайтарды Екі ұлттық мерекені жою жоспарынан бас тартты. Алайда халық бұл жеткіліксіз деп үкіметтен толықтай бас тартуды сұрауда.
Надья, кәсіподақ өкілі:
Үкіметтің әрекетінен жағдайымыз барған сайын қиындап жатыр. Инфляция өсіп барады. Жұмыс кестесінен мерекелік күндерді алып тастау туралы сөз қозғалған еді, енді төленетін бесінші демалыс аптасын қысқарту жоспарланып отыр. Біз бұған түбегейлі қарсымыз.
Жиром Муазан, Полицейлер кәсіподағы басшысының орынбасары:
- Мұндай қысқартулар еңбек өнімділігіне әсер етпей қоймайды. Полицейлерге материалдық көмек өте аз. Бізге ғимараттар мен жеке қорғаныс құралдары жетіспейді. Жағдай осылай жалғаса берсе, өз міндеттерімізді тиісінше орындай алмайтын боламыз.
Парижде шеру Бастилия алаңынан басталып кейін жұрт Ұлт алаңына жиналды. Акцияны ұйымдастырушылар шаһардағы көлік қозғалысын тоқтатуды мақсат еткен. Таңертеңнен бері Париж метросында автоматтандырылмаған желілердің басым бөлігі істемей тұр. Билік наразылықтардың өзінен емес, тәртіпсіздіктерден қауіптеніп отыр. Қоғамдық тәртіпті қадағалауға 80 мыңнан астам полицей жұмылдырып, бронетранспортерлер қолданылып жатыр. Соңғы рет мұндай техника «сары жейделілер» наразылығы кезінде көрінген еді. Марсельде 30-дан астам шеруші ұсталды. Лионда демонстранттар айналма жолды жабуға тырысып, кептеліс пайда болған. Бірқатар қалада оқушылар оқу орындарының кіреберісін бөгеп тастады.
Ал наразылық қозғалысын ұйымдастырған кәсіподақтар халыққа үндеу жолдап, үкіметтің үнемдеу шараларының ауыртпалығы ең алдымен жұмысшы табы мен зейнеткерлерге, мүгедектерге түсетінін айтқан. Мәселе жұмыссыздық бойынша сақтандыру реформасы, әлеуметтік төлемдерді тоқтату, зейнетақыны индексацияламау және медициналық жарналарды екі еселеу туралы болып отыр. Кәсіподақ өкілдері бюджеттің қазіргі нұсқасы әлеуметтік, қаржылық және экологиялық тұрғыдан әділетсіз дейді.
Авторлары: Айдана Айтбекқызы, Руслан Өміржан
