Мәжілісте банктер туралы жаңа заң жобасы таныстырылды.
Мәжіліс депутаты Анас Баққожаев цифрландыру немесе ЖИ арқылы банк пен қарызға кірген адамның арасын реттейтін жүйені енгізуді ұсынды, деп хабарлайды inbusiness.kz сайты.
"Жақында жеке тұлғаны банкрот деп жариялау бойынша заңнның жетілдіруі жөнінде дөңгелек үстел өтті. Жақсы талқылау болды. Сол жерден біздің естігеніміз – қарыз алып алып, жағдайы нашарлап, банкке ақшасын қайтара алмай жүрген адамдар арыз жазып барады, бірақ оның арнайы талаптары бар. Ең алдымен банкрот болар алдында банк оны реттеу керек. Банк пен қарыз алған адам бір-бірімен отырып, келісуі керек. Қарыз болған адам жағдайы қиын екенін дәлелдеуі керек. Банк оған түсіністік танытуы қажет", – деді мәжілісмен.
Ол шын мәніне келген кезде банктер халықтың жазған арыздарын, өтініштерін дұрыс қарамайды деп отыр.
"Өлсең де төлейсің. Өкінішке қарай, көп жағдайда қарым-қатынас солай болып жатыр. Енді қараңыз, банктер қарыз беретін кезде тез скоринг өткізеді де, бес минуттың ішінде шығарып бере салады. Ал енді жағдайы нашар деген кезде цифрландыру жүйесі мұндайда жұмыс істемей қалады. Біз неге ондайды енгізбейміз? Жасанды интеллект жүйесін жасап, қарыз алған адамның жағдайын жасанды интеллект шешіп беру керек. Иә, ол жағдайы жақсы кезде қарыз алды, бірақ бір жағдай болып қалды, кірісінен бір бөлігін басқа жерге төлеуі керек", – деді Анас Баққожаев.
Мәжіліс депутаты цифрландыру немесе ЖИ арқылы банк пен қарызға кірген адамның арасын реттейтін жүйені енгізуді ұсынды.
Қаржы нарығын реттеу және дамыту агенттігінің төрағасы Мәдина Әбілқасымованың сөзінше, қазіргі таңда борышты коллективті реттеу тетігі әзірленген.
"Жаңа платформа енгіздік. 1 тамыздан бастап ол пилоттық режимде жұмысын бастады. Бізге борышкер жүгінген кезде әдетте оның банктер немесе микроқаржы ұйымдары алдында бірнеше несиесі болады. Негізінен ұйымдарда өтінішті қарау тәртібі әртүрлі. Бір банк несиені есептен шығарып, қарыздың бір бөлігін кешіруі мүмкін, ал басқа микроқаржы ұйымдары мұндай қадамдарға бармауы мүмкін. Сондықтан біз бұл платформаға ірі банктерді, 12 микроқаржы ұйымын қостық. Яғни, борышкер платформаға жүгінген кезде оған оның қаржылық жағдайына сәйкес келетін кесте ұсынылатын болады", – деді ол.
Оның сөзінше, жыл аяғына дейін 300 мыңға жуық адамды осы платформа аясында қамту жоспарланып отыр.
