Бұл қаулы шілде айының басында жарияланған еді, ал жаңа тәртіп 2025 жылғы 9 қыркүйектен бастап күшіне енді.
Қазақстанда айырбастау пунктерінің валюта бағамы көрсетілген таблолары енді тек ғимарат ішінде немесе касса жанында ғана орналастырылады, деп жазады inbusiness.kz сайты.
Ережеге сәйкес, валюта бағамы көрсетілген ақпараттық стендті ғимараттың сыртына, шатырға, қабырғаға, сондай-ақ көшедегі стационарлық, жылжымалы немесе тасымалданатын орындарға қоюға тыйым салынды.
Дегенмен, айырбастау пункті әуежайда, вокзалда, шекара бекеттерінде, іскерлік орталықтарда немесе казино аумағында орналасқан жағдайда, таблоны қоюға рұқсат етіледі.
Ұлттық банк төрағасы Тимур Сүлейменовтің айтуынша, мұндай шектеу халықтың назарын валюталық айырбас бағамының өзгерісіне тым қатты аудармау және алыпсатарлықты азайту үшін енгізілген. Сондай-ақ, Ұлттық банк жаңа талапты орындамаған айырбастау пунктеріне шара қолданылатынын ескертті.
