Бүгін Алматының Алмалы аудандық сотында аса ірі көлемдегі алаяқтық ісі қаралды .
Өзін "қазақтың Робин Гуды" деп атайтын Ілияс Сәриев пен Ақтоты Дүйсееваға қатысты қылмыстық істе жәбірленушілер оқиға барысын айтып берді, деп хабарлайды inbusiness.kz сайты.
"Елге көмек" қорына алданғандардың бірі – Гүлбахор Түреева. Ол баспанасыз екенін, сондай-ақ қолында мүгедектігі бар 5 адамның: күйеуі, қызы және үш бірдей немересінің барын айтты.
– Жұмыста жүргенімде олар үйімізге келіп, тұрмыс жағдайымызды видеоға түсірді. Бізге пәтер алып беретінін айтты. Мен ондай көмек қажет емес дегеніммен, Ілияс бәрібір сендіріп бақты. Кейін кафеге шақырып, бізге үй сатып алғанын мәлімдеді. Бірақ, пәтерді көзбен көрген жоқпыз, тек "Көкжиек" ықшам ауданынан екенін айтты. Жиналған қаражат Сәриев пен Дүйсееваның есепшотына аударылған, – деді ол сотта.
Кейін айыпталушылар пәтерді олардың атына тіркеу үшін тағы ақша талап еткен.
– Құжаттарды рәсімдеу үшін 200 мың теңге бердім. Бұдан бөлек жол ақысы, тамағы, басқа шығындары үшін бірнеше рет ақша сұрап, барлығын қолма-қол бердім, – деді жәбірленуші.
Жалпы, келтірілген залал көлемі 800 мың теңгеге жеткен. Қорғаушы тарап Сәриевтің баспанасыз қалған әйелге уақытша жалға алу үшін 300 мың теңге бергенін алға тартты.
Отбасы ол пәтерде бар болғаны бір жеті ғана аялдапты, басты себеп, иесі мүгедектігі бар балалардың мінез-құлқына басымдық беріп, оларды тезірек шығарып жіберген.
Жәбірленушінің сөзінен соң судья Ернар Қасымбеков үзіліс жариялап, іс материалдарын қарауды 2025 жылдың 4 қыркүйегіне дейін шегерді.
Бұл іс бойынша барлығы 26 адам жәбірленуші ретінде тіркелген, олардың 12-сін адвокаттар қорғап отыр.
– Біз әріптесім екеуіміз 12 жәбірленушінің мүддесін қорғаудамыз. Сотталушылар сенімді теріс пайдалану арқылы адамдарды алдап, олардың қаражатын иемденген. Әлеуметтік желілерде "қажылыққа апарамыз" деп те, мүгедектігі бар жандарға "пәтер әпереміз" деп те ақша жинаған, – деді адвокат Асылбек Абдрайымов соттан кейін.
Қорғаушылардың сөзінше, жәбірленушілерге келтірілген жалпы залал көлемі – 25 миллион теңге.
Бұған дейін "Елге көмек" қорының басшысы 26 айыптың тек алтауын мойындаған еді.
