Ол "тропикалық жемістер Сыр өңірінің топырағына жерсінбейді" дегеннің бос сөз екенін дәлелдеп үлгерген.
Ақерке Кеңесбайқызы – 20 жылдан астам уақыт бойы жылыжай шаруашылығын қолға алған сала маманы, деп жазады inbusiness.kz сайты.
Ауыл шаруашылығы ғылымдарының магистрі жылыжайында әуелі қияр, қызанақ, қырыққабат, т.б. секілді көкөністерді өсіріп бастаған. Кейіннен банан, папайа, лимон, мандарин сынды тропикалық жемістерді де жерсіндірген.
– Қызылорда облысында жылыжай шаруашылығы кеңінен дамымай тұр. Көп адам тропикалық жемістер егіп, көкөністер арқылы жылыжай шаруашылығын дамытуға қорқады. Дегенмен, тыңғылықты еңбектің арқасында кез келген өсімдікті жерсіндіруге болады. Өкініштісі сол, бізде бұл саланың қыр-сырын білетін тәжірибелі мамандар жетіспейді. Бұл басқа бір әлем болғандықтан, әрбір өсімдік түріне ерекше қамқорлық қажет, – деді ол.
Қызылордалық ғалым болашақта үлкен жылыжай кешенін ашуды армандайды. Сол арқылы қауіпсіз тағам қорын арттырып, ішкі нарықты қамтамасыз еткісі келеді.
– Бұл – тек менің ғана емес, бүкіл өңір үшін маңызды жоба. Біз неғұрлым өзіміздің табиғи өнімімізді өндірсек, соғұрлым ішкі нарықтағы сапалы әрі қауіпсіз тағам қоры артады. Алдағы мақсатым – Қызылордада тропикалық және дәстүрлі дақылдарды өсіретін үлкен кешен немесе қысқы жылыжай жүйесін қалыптастыру, – деп сөзін жалғады Ақерке Кеңесбайқызы.
