Семейдегі жылу көздері қысқы маусымға 86% дайын. Ал 12 нысан әлі жөнделіп жатыр. Премьер-министрдің кеңесшісі Ермек Маржықпаевтың өңірге сапарынан кейін Үкіметтің баспасөз қызметі осындай ақпарат таратты. Жалпы облыс бойынша 23 энергия көзі мен 26 шақырым жылу желісі жөндеуден өтіп жатыр. Нәтижесінде құбырлардың тозуы 59 пайыздан 56 пайызға дейін төмендейді. Қазір аймақтағы барлық нысанның жылыту маусымына дайындығы шамамен 80 пайыздан асады.
Жандос Кәкібаев, «ТеплоКоммунЭнерго» ШЖҚ КМК директорының өндіріс жөніндегі орынбасары:
Осы нысандағы қазандықтар жөнделіп жатыр. Кейбір сорғылар, құбырлар ауыстырылады. Бюджеттен 97 млн тг бөлінді. 15 қыркүйекте жұмыс түгел аяқталады.
Ақтаудағы тұрғын үйлер мен әлеуметтік нысандар да жылыту маусымына 80% дайын. «МАЭК» энергия кешенін жаңғырту жұмыстары жалғасып жатыр. Өңірге барған үкімет басшысының кеңесшісі Ералы Тоғжанов энергия блоктары мен қазан агрегаттарында атқарылған істі тексерді. МАЭК-тың реконструкциясына қаражат үкімет резервінен бөлінген еді. Қалада жылу желілері де жаңартылып жатыр. Былтыр 22,6 км құбыр ауыстырылған еді. Биылғы жұмыс аяқталған соң желілердің орташа тозу деңгейі 79 пайыздан 75 пайызға дейін төмендейді.
Сәкен Бердібаев, «Алматыинжстрой» АҚ өндіріс бойынша директоры:
Биыл 2025 жылы 1 және 4 жоба бойынша 22,5 км құбыр ауыстырылып жатыр. Бүгінгі таңда 90 пайыз жұмыс аяқталды. Қыркүйек айының 15 дейін осы жұмыстың бәрін аяқтап су жіберуді жоспарлап отырмыз.
Данияр Қайыртай
