Агроөнеркәсіптік кешендегі мемлекеттік инспекция комитетінің Ақтөбе қалалық аумақтық инспекциясының басшысы Ерлан Ибрашевтің әріптесімен сөзге келіп қалғаны белгілі болды.
Кеңес мүшелері оның ісін Әдеп жөніндегі кеңесте қарап, оған сөгіс түріндегі жаза тағайындауға ұйғарым берді, деп хабарлайды inbusiness.kz сайты.
Мемлекеттік қызмет істергі агенттігінің Ақтөбе облысы бойынша департаменті басқармасының бас маманы Данияр Махамбетовтың сөзінше, инспекция басшысы отырған кабинетке бас маман А.Сейтмұхамбетова рұқсатсыз кірген әрі амандық-саулық та сұраспаған. Сол сәтте екеуі сөз таластыра кеткен.
– Жиналыс барысында А.Сейтмұхамбетова инспекция басшысы Е.Ибрашевтен кешірім сұрады. Десе де, Е.Ибрашев кешірім қабылдамайтынын білдірген соң, А.Сейтмұхамбетова "енді сенің аяғыңды сүйейін бе?" деп айтты. Осы жағдайдан кейін Е.Ибрашев ашуға ерік беріп, "ей, сен, не екіжүзденіп отырсың, аферистенбе!" деген сөздерді айтып, жиын аяқталмастан залдан шығып кетті, – деді Данияр Махамбетов.
Әдеп жөніндегі кеңес отырсында Ерлан Ибрашев болған жайтқа денсаулық жағдайы әсер еткенін сөз етті.
– "Екіжүзді адам" деп айтқаным рас. "Сен афериссің!" демедім, оның бәрі – жалған. "Аферист адамның ісін істеп тұрсың" дедім. Бірінші жылап кешіріп сұрады, кейін мазақ қылып, күліп "сенің аяғыңды сүйем ба, аяғыңа жығылам ба?" деді. "Мемлекеттік қызметкер аферист адамның ісін істеп тұрсың" дедім, – деген уәж айтты ол.
Әдеп жөніндегі кеңес мемлекеттік қызметшіге сөгіс түріндегі тәртіптік жаза тағайындау туралы ұйғарымға келген. Басшы ұжымдағы ауызбіршілікті сақтай алмағаны үшін жазаланып отыр.
