Астанадағы Назарбаев университетінде студент жатақхананың 12-қабатынан құлап кеткен, деп хабарлайды Egemen.kz.
Қайғылы оқиға 15 тамызда орын алды, бірақ ол туралы бүгін ғана белгілі болды. Астана қалалық полиция департаментінің мәліметінше, 22 жастағы қыздың өліміне қатысты қылмыстық іс қозғалды.
«Қазіргі уақытта болған оқиғаның барлық мән-жайын анықтау бойынша жұмыс жүргізіліп жатыр», деп атап өтті полиция.
Назарбаев Университетінің баспасөз қызметі қайғылы оқиғаның кампус аумағында болғанын растады.
«Университет марқұмның отбасы мен жақындарына шын жүректен көңіл айтады. Барлық қажетті шаралар орындалып жатыр: жедел қызметтер мен құқық қорғау органдары тартылып, марқұмның туыстарына психологиялық қолдау көрсетіліп жатыр», деп хабарлады университеттің баспасөз қызметі.
Айта кетейік, бұл Назарбаев Университетінде жаз мезгілінде орын алған екінші қайғылы жағдай. Бұған дейін 18 маусымда студент қыздың жатақханадан өлі табылғаны анықталған еді.
