Қазақстанда қазіргі уақытта теміржол саласын дамыту мақсатында бес жаңа ірі жоба бойынша құрылыс жұмыстары жүргізіліп жатыр
Бұл туралы Caravan.kz медиа порталы baq.kz-ке сілтеме жасап хабарлайды.
Үкімет отырысында Көлік министрі Нұрлан Сауранбаев қандай жобалалар жүзеге асырылып жатқанын айтып берді.
«Достық – Мойынты», «Алматы айналма теміржолы», «Дарбаза – Мақтаарал», «Мойынты – Қызылжар» және «Бақты – Аягөз» бағыттарында теміржол желілерінің құрылысы қарқынды жүріп жатыр. Биыл жоспарланған мерзімінен бұрын екі маңызды инфрақұрылымдық жоба аяқталады. Олар – «Достық – Мойынты» учаскесі мен Алматы айналма теміржолы, — деді министр.
2026 жылы тағы екі жаңа бағыт — «Мойынты – Қызылжар» және «Дарбаза – Мақтаарал» теміржол желілері пайдалануға беріледі деп күтіліп отыр.
Сонымен қатар жыл басынан бері елімізде жалпы ұзындығы 3 000 шақырым болатын теміржол желісін толық жаңғырту жұмыстары басталды. Бұл жаңарту көлемі жаңа жол салумен тең. Мәселен, жаңғырту нәтижесінде «Қызылжар – Сексеуіл» учаскесінің өткізу қабілеті 8 пойыздан 25 пойызға дейін, ал «Қандыағаш – Тобыл» бағыты бойынша 7 пойыздан 25 пойызға дейін артады.
