«Үлкен дулыға» турнирлерінің 24 дүркін жеңімпазы сербиялық Новак Джокович кәсіби мансабындағы 100-ші титулын жеңіп алды, деп хабарлайды El.kz ақпарат агенттігі.
Швейцарияның Женева қаласында өткен ATP-250 санатындағы турнир финалында Джокович әлемнің 31-ракеткасы польшалық Хуберт Хуркачты 5:7, 7:6 (7:2), 7:6 (7:2) есебімен жеңді.
Жалпы, ATP туры тарихында (1990 жылдан бастап) бұл көрсеткіш бойынша рекорд швейцариялық Роджер Федерерге тиесілі – 103 титул. Ал ашық дәуірдің (1968 жылдан бері) абсолюттік рекордшысы – америкалық Джимми Коннорс. Оның еншісінде 109 титул бар.
Женева турнирінің жеңімпазы ретінде Джокович 90 675 еуро жүлде мен 250 рейтингілік ұпай иеленді. Ал финалда өнер көрсеткен Хуркачқа 52 890 еуро мен 165 ұпай бұйырды.
