Ислам дінінде үйленудің өзіндік парызы мен шарттары бар.
Ақтөбе тұрғыны "Нұр Ғасыр" мешітінде қызға тиісіп, "бір реттік неке" ұсынған. Кейін бұл оқиға көпшілік арасында кең тарап, талқыға түсті. Осы орайда Информбюро тілшісі ислам дінінде "бір реттік неке" бар ма, жоқ па деген сұраққа жауап іздеді.
Ақтөбе тұрғыны Эммануэлла Наурызбаева Instagram парақшасында мешіт кіреберісінде ер адамның оған интимдік мақсатта "бір реттік неке" ұсынғаны туралы видео жариялады. Осы видеодан кейін Ақтөбе қалалық полициясы видеодағы адамды анықтап, оны бес тәулікке қамады.
Посмотреть эту публикацию в Instagram
Публикация от Emmanuella Nauryzbaeva (@emmanuellanauryzbaeva)
ҚМДБ мәлімдемесі
Қазақстан мұсылмандары діни басқармасы бұл оқиғаға байланысты мәлімдеме жасады.
"Мешіт – құлшылық пен тәрбие ордасы. Онда келген әрбір азамат өзін әдеппен, ізетпен ұстауға міндетті. Ислам шариғатында өзгеге тіл тигізу, орынсыз сөз айту, әсіресе әйел затына қолайсыз пікір білдіру – мұсылман әдебіне сай келмейтін және айыпталатын іс-әрекет. ҚМДБ қыз балаға орынсыз сөз айтқан азаматтың әрекетін айыптайды. Өйткені, мұндай әрекет мұсылмандыққа жат, әрі адамгершілік қағидаттарына да сай емес", – делінген хабарламада.
ҚМДБ жамағатты сабыр мен парасаттылыққа шақырып, жалған ақпарат пен арандатушылық әрекеттерге ермеуге үндейді.
Оқи отырыңыз: "Мәһір – қалыңдықты саудалау емес, Құдайдың берген құқығы". Имам мешітте неке қидыру ережелерін түсіндірді
"Бір реттік неке" үкімі
ҚМДБ шариғат және пәтуа бөлімінің маманы, ұстаз Елбек Тасболатұлы исламда уақытша неке деген мүлдем жоқ екенін, уақытша некенің үкімі қандай екенін айтты.
"Ақ неке – ер мен әйел затының отбасын құру мақсатында жасалатын қасиетті келісім шарт. Сондықтан да, ақ некенің басқа келісім шарттардан қарағанда өзгеше талаптары бар. Мысалы, неке қимақшы болған ер мен әйел бір-біріне жақын туыс болмауы, қалындық тарапының қамқоршысының (әкесі, атасы, ағасы,баласы арнайы тәртіппен) келісімі, күәлардың қатысуы, екі тараптың разылығы және басқа да шарттар қойылады. Біздің ұстанатын бағытымыз – көпшілік ғұламалардың жолы. Яғни уақытша неке мүлдем дұрыс емес", – деді ұстаз.
Елбек Тасболатұлы исламда уақытша неке есепке алынбайтынын, бұндай неке қиылған болып есептелмейтінін айта кетті. Мұндай ұғым төрт мәзһабта да жоқ. ҚМДБ ханафи мәзһабын ұстанғандықтан бұндай некені жоққа шығарады.
"Бір реттік неке" кейбір жат ағымдардың өздеріне жасап алған дүниесі. Мұндай неке қоғамда бұзақылықтың, арсыздықтың жайылуына себеп болады. Сондықтан жезөкшелікке ұқсайтын дүние болып есептеледі немесе діннің атын жамылып жезөкшелікті адалға шығарып алу деп есептесек те болады. Салдары өте ауыр. Мұндай неке есептелінбегендіктен жезөкшелікпен қатар дінде қатаң тыйым салынған зинамен айналысу және оны діннің атымен ақтап алу болып есептеледі. Бұл күнәнің үстіне күнә, азғындық үстіне азғындық болмақ. Дініміз бұндай нәрсеге қатаң тыйым салады. Сондай азғындыққа түсіп қалмау үшін ресми орындардан, мешіттен дінге қатысты мәселенің мән-жайын анықтап алу керек", – деді Елбек Тасболатұлы.
Үкімі: "бір реттік неке" зина, харам болып есептеледі.
Оқи отырыңыз: "Зинақорлықты ақтау". Азаматтық некенің Исламдағы үкімі қандай
Шариғат бойынша неке қию
Жалпы неке сөзінің негізі – "никах" деген араб сөзі. Ислам дінінде үйленудің өзіндік парызы мен шарттары бар. Парызы екеу: біріншісі – үйлену сөзі, ұсыныс, екіншісі – ұсынысты қабыл алу.
Шарттары:
- некелесуге рұқсат етілген жандар болуы қажет (рұқсат етлімейтін туыс, біреудің әйелі, апалы-сіңлілі екі қызды бірдей алу);
- үйленетін жандар өмірлік некені мақсат етуге тиіс;
- қиылған неке дұрыс болуы үшін куәгер болуы және екі жақтың разылығы болуы шарт.
Аталған шарттардың бірі кем болған жағдайда Әбу Ханифа мәзһабы бойынша неке дұрыс болып саналмайды.
Мұхаммед пайғамбар (с.ғ.с) өзінің ұлағатқа толы хадистерінде де үйленудің, жұбайлық өмірдің өзінің сүннетінен екендігін баса айтады. Үйленуді, шариғат жолымен некелесуді мойындамаған жанды өз үмбетінен деп есептемейтіндігін ескертеді.
"Азаматтық неке" үкімі
ҚМДБ некесі қиылмаған "азаматтық неке" шариғатта некесіздікке жатады дейді.
"АХАТ бөлімінде ресми тіркелмей немесе мұсылманша неке қиылмай жақындасу зина ұғымына кіреді. Осылайша, екі тарап "ерлі-зайыпты болуға дайындық, тәжірибе" деген желеумен ауыр күнә болып саналатын зинақорлықты ақтауға тырысады. Негізінде мұсылман шариғатында халал мен харам анық ажыратылып көрсетілген", – делінген ҚМДБ хабарламасында.
"Азаматтық некенің" шариғатқа қайшылықтары:
- Азаматтық некеде неке қиылмай ер мен әйел төсек қатынасына барады. Ал неке қиылмай төсек қатынасына бару шариғи тұрғыдан зинаға жатады. Зина шариғатта үлкен күнә болып есептеледі. Алла Тағала Құран Кәрімде зинаға мүлде жоламауды қатаң ескерткен: "Зинаға мүлде жоламаңдар. Шын мәнінде, ол – анық арсыздық әрі ең жаман жол" ("Исра" сүресі, 32-аят).
- Азаматтық некенің салдарынан дүниеге келген бала ойнастан туған болып есептеледі.
- Дүниеге келген сәби шариғи тұрғыдан мұрагерлік, қамқорлық құқықтарынан айырылады.
- Сәбидің ата-анасы шариғат бойынша зинақор деген атауға ие болып, Алланың құзырында ауыр есепке тартылады.
- Отбасылық жауапкершілік сақталмайды. Негізінде, ер-азаматқа отбасын асырап-бағу, нәпақа табу міндеті жүктеледі. Ұрпақ тәрбиесі, үй шаруашылығы әйелдің еншісінде.
- Ал азаматтық некеде мұндай жауапкершілік мүлде сақталмайды. Олар бар болғаны бір-бірін сынау, тәжірибе мақсатымен ғана бірге тұрады.
- Жетесіз нәсілдің қалыптасуына септігін тигізеді. Себебі қазақ жұрты өзінің тегін, ұлтын білмейтін ұрпақты, жеті атасын білмегенді "жетесіз" деп атаған.
Үкімі: АХАТ бөлімінде ресми тіркелмей немесе мұсылманша неке қиылмаған "азаматтық неке" – зина, харам болып саналады.
