Бұл жаңартумен бірге Apple құрылғыларына OpenAI компаниясының ең жаңа GPT-5 нейрожүйесі Apple Intelligence қызметіне біріктіріліп енгізілуі мүмкін.
Қыркүйекте өтетін iPhone 17 таныстырылымынан кейін Apple iOS 26, iPadOS 26 және macOS Tahoe 26 жүйелерінің соңғы нұсқаларын шығаруды жоспарлап отыр, деп хабарлайды inbusiness.kz сайты.
Инсайдерлердің мәліметінше, компания GPT-5 моделін жергілікті жүйелер орындай алмайтын күрделі және ресурсты көп қажет ететін тапсырмаларды шешу үшін қолданбақ. Осылайша Apple GPT-4o-дан бас тартып, Siri мен басқа да сервистердің мүмкіндіктерін айтарлықтай кеңейтуді көздейді.
АЗЕРТАДЖ шетелдік БАҚ-қа сілтеме жасап хабарлағандай, қазір Apple Intelligence шектеулі түрде GPT-4o моделін пайдаланады. Бұл функция құжаттардың қысқаша мазмұнын жасау, мәтін жазу, Siri арқылы сұрақтарға жауап беру және камера көмегімен нысандарды тану мүмкіндіктерін ұсынады.
GPT-5 интеграциясы құпиялылықтың жоғары стандарттарымен жүзеге асады. ChatGPT арқылы сұраныс жіберген пайдаланушылардың IP мекенжайлары жасырын болады, ал OpenAI бұл деректерді сақтамайды. Дегенмен OpenAI тіркелгісін Apple Intelligence жүйесіне қосқан қолданушылар кеңейтілген функцияларға қол жеткізе алады, бірақ бұл жағдайда OpenAI деректерді өңдеу ережелері қолданылады.
OpenAI флагмандық GPT-5-пен қатар ашық бастапқы кодтағы екі ірі тілдік модельді де таныстырды. Олардың бірі Apple Silicon негізіндегі Mac құрылғыларына оңтайландырылған. Apple бұл модельдерге қолдау көрсететінін ресми түрде хабарлаған жоқ, бірақ бұл болашақта құрылғыларда жасанды интеллекттің автономды жұмыс істеу мүмкіндігіне жол ашуы ықтимал.
Қыркүйектегі жаңартулардан кейін пайдаланушылар GPT-5-пен қатар Apple Intelligence жүйесінің жаңа мүмкіндіктерін де пайдалана алады. Мысалы, Live Translation FaceTime, Хабарламалар және қоңырау кезінде сөйлеуді нақты уақытта аударады. Visual Intelligence экрандағы контентті танып, оны әртүрлі қосымшаларда қолдануға мүмкіндік береді.
GPT-5-ті пайдалану үшін iPhone құрылғысында ChatGPT-ке қол жеткізуге рұқсат беру қажет болады.
