Елорда төрінде орналасқан Ұлттық музейдің «Тарих» залында туғанына 180 жыл толып отырған ұлы ақын Абай Құнанбайұлына арналған арнайы бұрыш бар. Мұнда ақын өміріне қатысты жәдігерлер қойылыпты. Соның бірі – мына самаурын.
Бұл жәдігердің құндылығы – кезінде самаурыннан қазақтың небір ұлылары шай ішкен. Соның ішінде Абай да бар. Осы бір тарихи бұйымды 2023 жылы музейге Халықаралық Абай атындағы мәдениет пен өнерді қолдау қорының президенті Аслан Ғафуров тапсырыпты.
Мұраны қабылдап алған музей актісінде: «Самаурын 1893 жылы Тула қаласында жасалған. Материалы – металл. Ені – 47 см, биіктігі – 53,5 см, диаметрі – 27 см. Бұл самауырдан Абай бастатқан ұлы тұлғалар шай ішкен» деп жазылыпты.
Ал самаурынды музейге өткізген Аслан Қабылбекұлы жазып қалдырған мәліметке жүгінсек: «Абай атындағы тұңғыш музей Семей қаласындағы Ертіс сағасында бой көтерген Бекбай Байысовтың үйінің ауласында ашылған. Дәл осы жерде көпір орныққан. Семейге келген қонақтар осы алаңға тоқтап, көпір арқылы қалаға өтеді екен. Алаңдағы Бекбай отбасы Абаймен жақсы қарым-қатынаста болыпты. Дана ақын бұл шаңыраққа үнемі қонақ болып тұрған екен. Бұл самаурыннан Абай және оның інісі Шәкәрім қажы, балалары Ақылбай, Мағауиялар шай ішкен», деп жазыпты.
Самаурынның кейінгі тағдырын жүлгелеп айтсақ, алаңдағы музей көшірілген кезде бұл жәдігерді Айтқали Қыстаубаев деген адам сақтап қалған. Осылай Айтқали Бейсембайұлының жеке қорында ұзақ жыл сақталған жәдігер ұрпақтан-ұрпаққа аманатпен жеткен. 1980 жылы ұлттық өнердің жанашыры, қазіргі таңда Халықаралық Абай атындағы мәдениет пен өнерді қолдау қорының құрылтайшысы Ермек Айтқалиұлы ескірген самаурынға реставрация жасатқан. Оны қарапайым ұста Кубрин деген азамат атқарып шығыпты. Ақыры бұл жәдігер 130 жылдан кейін елорда төріндегі музей қорынан орын алған.
