Кеше Астанадағы №2 облыстық ауруханада жайсыз жағдай тіркеліп, жас келіншек түсік тастаған едік. Бүгін бұл жағдайға қатысты мекеме басшысы Изат Бюрабеков түсініктеме берді, деп хабарлайды Skifnews.kz ақпарат порталы.
Оның айтуынша, дәрігерлер аталған жағдайды жария еткен блогерге қатысты сотқа шағым дайындап жатыр. Талап арыз Қазақстан Республикасы Азаматтық кодексінің 143-бабына – «Ар-намысты, қадір-қасиетті және іскерлік беделді қорғау» бойынша беріледі.
Изат Бюрабековтың сөзінше, блогер жариялаған жазбаларда жағдай айтарлықтай бұрмаланған. Қазір бұл жазбалар әлеуметтік желіден өшірілген. Сонымен қатар, ол блогердің оқиға кезінде ауруханада болмағанын ерекше атап өтті.
Бас дәрігердің айтуынша, Диана есімді пациент қажетті деңгейде бақылауда болған. Оның жағдайына байланысты әрбір 1,5-2 сағат сайын қарап отырған. Егер науқастың қан кетуі тіркелсе, мүлде басқа емдеу тактикасы қолданылатынын айтты. Ал Диананың жағдайында «қатты қан кету» емес, «мөлшерден аспайтын қан аралас бөлінділер» болған. Бұл ретте маңызды көрсеткіштердің бірі — гемоглобин деңгейі — талдауларда қалыпты шектерде қалған.
Изат Бюрабеков дәрігерлер жүктілікті сақтап қалуға тырысқанын, алайда барлық шараларға қарамастан, әйел ағзасында түсік тастау процесі тоқтамағанын жеткізді.
— Мұндай жағдайлар жүктіліктің ерте кезеңінде жиі кездеседі. Әйелдің ағзасы қандай да бір себептермен жүктілікті жалғастырудан бас тартады. Науқасымыздың жүктілік мерзімі — 6 апта 5 күн. Айта кетейік, жүктілікті есепке алу әдетте 8-12 апта аралығында басталады, — деді ол.
Сондай-ақ, Бюрабеков әлеуметтік желіде тараған «қыз баласы жаңа туған сәбиден айырылды» деген пікірмен келіспейтінін айтты. Себебі бұл жағдайда толық қалыптаспаған, ішкі органдары енді ғана дамып келе жатқан, ұзындығы 3-6 миллиметр болатын эмбрион туралы сөз болып отыр.
