Ішкі Істер министрлігінің мәліметінше , адамдардың дені қылмысқа мас күйінде барады.
Қазақстанда 400-ден астам ауыл ішімдіктен бас тартып, салауатты өмір салтына бет бұрған, деп хабарлады 31 арнаның Информбюро ақпараттық бағдарламасы.
Үкімет басшысы Олжас Бектенов игі бастаманы жүзеге асырып жүрген азаматтарды ынталандырып, маскүнемдікке қарсы күрес күшейетінін жеткізді. Себебі, алокогольді өнімдер сатылмаса қылмыс азаймақ
Оразбай Жанғарин Еңбек ауылының байырғы тұрғыны. Бес жыл бұрын ақсақалдар ішімдіктен бас тарту туралы бастама көтеріп, бәріміз қолдадық деп отыр. Қазір қандай да бір жиын-той болса дастарханға арақтың орнына қымыз, шараптың орнына шұбат қойылатынын айтады.
"Біздің кезімізде ертеректе бұл басқаша болса да, мынау қазіргі жастардың осындай іс-әрекеттеріне, арақ-шараптан бас тартуына шылым тартуына бас тартуына міне осы жағдай бізді өте қуантады. Елімізде осындай ауылдардың саны көбейген сайын елде де үлкен жетістіктер болады деп ойлаймын", – деді Еңбек ауылының тұрғыны Оразбай Жанғарин.
Бұл ауылдың дүкендерінен алкогольді өнім таппайсыз. Салауатты өмір салтын ұстанған жастардың көбі бос уақытын спортқа арнайды екен. Тұрғындар өзге елдімекендерге челлендж жолдап, нәтижесінде өңірде 19 ауыл бұл бастаманы қолдапты.
Еңбек шағын ғана ауыл. Елді мекенде жүзге жуық тұрғын өмір сүреді. Ішімдіктен бас тартқалы тәртіп пен тыныштық орнағанын полицейлер де растайды.
Ішкі Істер министрлігінің мәліметінше, адамдардың дені қылмысқа мас күйінде барады. Әрбір үшінші бұзақылық пен төртінші тонау да ащы суға сылқия тойып алғандардың қолымен жасалады екен. Сондықтан үкімет басшысы маскүнемдікке қарсы күрес шеңберінде ішімдіктен бас тартқан елдімекендерді қолдайтынын мәлімдеді.
Демек, осы бастамаларды жүзеге асыратын белсенділер мен әкімдіктерді қолдау керек деп отыр. Қазір ел бойынша арақтан бас тартқан 400-ден астам ауыл бар.
