Шымкентте қала әкімінің орынбасары Руслан Берденовке жасалған қастандық ісі сотқа жолданды, — деп хабарлайды Massaget.kz тілшісі.
Резонанстық іске қатысты алдын ала тыңдау 2025 жылғы 28 шілдеде сағат 10:00-ге белгіленген.
"Шымкент қаласының қылмыстық істер жөніндегі мамандандырылған ауданаралық сотына ҚР Қылмыстық кодексінің 24-бабы 3-бөлігі және 99-бабы 1-бөлігі бойынша Ж. есімді азаматқа қатысты іс келіп түсті", – деп мәлімдеді Шымкент сотының баспасөз қызметі.
Аталған істе басты күдікті – Ернар Жиембай. Бұған дейін оның жары Луиза Алданова Instagram парақшасында жағдайға қатысты пікір білдірген болатын. БАҚ мәліметінше, Жиембай бұған дейін "Тұрғын үй Шымкент" ЖШС-нің басшысы қызметін атқарған.
Еске салайық, биыл 21 сәуір күні кешке Шымкент қалалық әкімдігі ғимараты маңында Руслан Берденовке оқ атылған еді. Шенеунік жарақат алып, ауруханаға жеткізілді. Күдікті оқиға орнында ұсталды.
Оқиғадан кейін әлеуметтік желіде шабуылдың себептері туралы түрлі нұсқалар тарала бастады. Соның бірі – қастандықтың тұрмыстық сипатқа ие екені және оның қызғанышпен байланысты болуы мүмкін деген жорамал.
Алайда кейін Шымкент әкімдігі бұл мәліметті теріске шығарды. Баспасөз қызметі: "Шабуылдың себебі – шенеуніктің күдіктінің жұбайына тиіскені" деген ақпарат шындыққа жанаспайды", – деп мәлімдеді.
Шымкент қалалық ішкі саясат және жастар істері басқармасының басшысы Айгерім Жұмакұлова күдіктінің әйелімен полиция департаменті ғимаратында кездескенін айтты. Әңгіме барысында жас әйелдің Руслан Берденовпен мүлде таныс емес екені анықталған.
Кейін Шымкент қаласы әкімінің орынбасары Сәрсен Құранбек әріптесіне жасалған шабуылдың жай-жапсарын айтып берді. Оның сөзінше, шенеуніктің жүргізушісі оқ атқан адамды ұстауға көмектескен. Берденовке үш рет оқ атылғаны кейін белгілі болды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
