Қозыбаев атындағы университет пен Аризона университетінің бірлескен бағдарламасы шетелдік талапкерлер үшін жаңа мүмкіндіктер ашып отыр, — деп хабарлайды Massaget.kz тілшісі.
Солтүстік Қазақстан университетіне 43 жастағы америкалық азамат психология мамандығы бойынша оқуға түсті. Бұл туралы ҚР Ғылым және жоғары білім министрлігінің баспасөз қызметі мәлімдеді.
Қазір бұл жоғары оқу орнында әлемнің 16 елінен келген студенттер білім алып жатыр. Соның ішінде Аризона университетімен бірлескен қосдипломдық білім беру бағдарламасы шет елден келген жастар үшін жаңа мүмкірдіктерге жол ашты. Биыл жоғары оқу орнына түсу үшін арнайы АҚШ-тан келген Илья Кушнирский құжат тапсырды. Ол жасы 43-ке келсе де, "оқу оқып, біліміңді одан әрі шыңдауға кеш емес" деп есептейді.
"Мен Нью-Йорк қаласынан боламын. Бірақ кейінгі 2 жыл бойы Санкт-Петербург қаласындағы клиникалық психология бойынша қайта дайындықтан өттім. Алматыдағы семинарлардың біріне қатысып, Қозыбаев университеті туралы білдім. Негізі көп уақыт бойы Америкада тұрдым. Алайда мені екі диплом алу мүмкіндігі қатты қызықтырды, сондықтан Қозыбаев университетін таңдап отырмын", — дейді талапкер.
Илья Кушнирский қос диплом бағдарламасы бойынша "Білім берудегі психология" мамандығына түседі. Шетелдік студент ретінде ол ақылы негізде оқитын болады. Алайда талапкер үшін бұл — қаржылық жағынан тиімді шешім. Мәселен, егер ол оқуды Аризона университетінің Тусон қаласындағы кампусында бастаса, жылына 40 мың АҚШ долларын төлеуі қажет болар еді.
Қызықты жаңалықтар мен видеоларды көру үшін TikTok арнамызға жазылыңыз!
