Қазақстанда алғаш рет кері осмос технологиясы бойынша суды тазарту жүйелеріне арналған спиральді-оралған мембраналардың толыққанды сериялық өндірісі іске қосылды, деп хабарлайды Қазақстан Республикасы Ғылым және жоғары білім министрлігінің баспасөз қызметінен.
MEMBRANECO жобасын "Экотэк Инжиниринг" компаниясы Сәтбаев университетімен бірлесе отырып, ҚР Ғылым және жоғары білім министрлігінің қолдауымен жүзеге асырды.
Өндірістік желілер "Алатау" арнайы экономикалық аймағында орналасқан. Кәсіпорын өнімнің өмірлік циклін цифрлық бақылауға арналған RFID белгілерімен жабдықталған алғашқы өнім партиясын шығарып үлгерді және өндірісті кеңейтуге дайын.
Бұған дейін су дайындауға арналған барлық мембраналар шетелден жеткізілетін. Енді ғылым мен бизнестің және мемлекеттің, атап айтқанда, Ғылым және жоғары білім министрлігінің ынтымақтастығы арқасында қазір қазақстандық мембраналарды шығару жолға қойылды. Ол Маңғыстау сынды өңірлерде суды тазарту мен тұщыту үшін қолданылатын болады.
Бүгін аталған кәсіпорында "Самұрық-Қазына Контракт" АҚ тарапы өзара міндеттемелердің орындалуына жоспарлы мониторинг жүргізді. Мониторинг тобы жобаның сәтті түрде жүзеге асырылуын жоғары бағалады, сөйтіп барлық құжатқа ешқандай ескертусіз қол қойды.
Біз Қазақстанның индустриялық әлеуетінің дамуына үлес қоса алғанымызға өте қуаныштымыз. Мониторингтен сәтті өту — ұлттық компаниялармен өзара әрекетіміздің ашықтығы мен тиімділігін қамтамасыз ете отырып, ауқымды жобаларды жүзеге асыруға дайын және қабілетті екенімізді көрсетті", — деді "Экотэк Инжиниринг" компаниясының басшысы Ануар Дукумбаев.
Сәтбаев университеті тек ғылыми сараптама жасап, зертханалық база мен өндірістік алаңдарды ұсынып қана қоймай, сонымен қатар кәсіпорынның тең құрылтайшысы атанды.
Бизнес пен технология тоғысында жүзеге асырылатын мұндай жобалар инженерлік білім беру экожүйесінің маңызды бөлшегіне айналып отыр. Бұл қазіргі жұмыс істеп тұрған өндіріс базасында мамандарды даярлауға ғана емес, сондай-ақ ғылыми инфрақұрылымға қосымша инвестиция тартуға да мүмкіндік береді", — деді Сәтбаев университетінің проректоры Сапар Шалабаев.
Мониторингтік топ жұмысының қорытындысы бойынша "Самұрық-Қазына" АҚ-ның еншілес компанияларына жоба операторымен оффтейк-келісімшарт жасау ұсынылды. Бұл — ұлттық экономиканың негізгі қатысушылары тарапынан көрсетілген сенімнің белгісі және өнімге тұрақты сұранысты қамтамасыз ететін маңызды қадам.
Біз отандық өндірісті дамытуға және елдің су қауіпсіздігін қамтамасыз етудегі технологиялық әлеуетін нығайтуға бағытталған бастаманы қолдауға әрдайым дайынбыз. Бұл біз үшін жай ғана өндіріс орнын ашу емес, бұл — ұлт денсаулығына, экологиялық тұрақтылыққа және Қазақстанның ғылыми-техникалық прогресіне қосқан үлесіміз", — деді "Самұрық-Қазына Контракт" компаниясы оффтейк-келісімшарт департаментінің жетекші менеджері Динара Түменова.
Қазіргі уақытта өндіріс көлемін ұлғайту, сүзгілеу элементтерінің түрлерін көбейту және Орталық Азия, Кавказ, Ресей мен Түркия нарығына экспортқа шығару бойынша жұмыстар жүргізілуде.