Көбі қарасораны есірткі алатын өсімдік ретінде біледі. Алайда бұл шөпті өнеркәсіптік мақсатта 30-дан астам ел қолданады.
Нарықтың 70%-ы Қытай мен басқа да Азия елдеріне тиесілі. Енді Қазақстанда да техникалық қарасора өсірілмек.
Өндірілетін өнім түрлері сан алуан. Құрамында есірткі заты жоқ техникалық қарасораны өңдеуге рұқсат етілгендіктен, жоғары деңгейде қорғалған қағаз шығару жоспарланып отыр. Яғни, жеке басты куәландыратын құжаттар, төлқұжаттар және түрлі арнайы бланкілер өндірілмек. Бұл өте жақсы экспорттық өнім. Азат Сұлтанов, ҚР Ауыл шаруашылығы вице-министрі
Министрліктің мәліметінше, бұл салада толық циклді агроөнеркәсіптік кешен құру көзделген. Қарасорадан қағаздан бөлек, мата, жіп, тоқыма бұйымдары, дәрі-дәрмек пен құрылыс материалдарын алуға болады, деп жазады qazaqstan.tv.
Ал кендір майының құрамында психоактивті зат болмағандықтан, ол тамақ өнеркәсібінде қолданылуы мүмкін.
Егер де қарасораны тек шикізат түрінде сататын болсақ, онда пайдасы аз. Егер де біз сол шикізаттан бір өнім шығаратын болсақ, 10 мың доллар салатын болсақ, ол жерден біз белгілі бір өнім шығару арқылы 120 мың долларға дейін пайда табуға болады. Бұл бір гектарды санаған кезде. Ең біріншіден, заң жүзінде мықты талап болуы керек. Перизат Бауыржанқызы, қаржыгер
Есірткі айналымының алдын алу үшін қарасора өсіру мен өндіру процесі толық бақылауға алынбақ. Ішкі істер органдары қарасора алқаптардан кенеттен сынама алып, құрамын тексереді. Есірткі табылса, егін жойылады. Төрт деңгейлі мемлекеттік бақылау енгізіледі, дейді Ауыл Шарушалығы министрінің орынбасары.
