Судья журналистердің залдан шығуын талап етіп, тікелей эфир жүргізуге де тыйым салды.
Астананың қылмыстық істер жөніндегі ауданаралық сотында қайырымдылық қорына жиналған қаражатты жымқыру ісі бойынша айыпталған Перизат Қайратқа қатысты сот процесі басталды.
Судья Сабыржан Кәрімовтің айтуынша, отырысқа 70-тен астам журналист қатысуға өтініш берген.
"Сотталушылардың өтінішімен жауап алу кезеңінде, оның ішінде айыпталушылар түсініктеме берген кезде және дәлелдемелерді зерттеу барысында сот отырысының ашықтығын шектеу туралы шешім қабылданды. Себебі бұл сәттерде құпия ақпарат жариялануы мүмкін. Сотталушылар тергеу барысында кез келген уақытта жауап бере алады. Осыған байланысты іске қатысы жоқ адамдар мен бұқаралық ақпарат құралдарының өкілдері сот залынан шығып, кейін қайта кіруі қажет болады. Бұл процесс ұзаққа созылып, сотқа қатысушылардың назарын аударады", – деді Сабыржан Кәрімов.
Судья журналистердің залдан шығуын талап етіп, тікелей эфир жүргізуге де тыйым салды.
Оқи отырыңыз: Перизат Қайрат расымен соққыға жығылды ма? Астана полициясы видео жариялады
Сотта Перизат Қайратқа қатысты іс бойынша айыптау актісі оқылды. Алайда ол өзіне тағылған айыпты мойындамай, айыптау актісін тергеушілердің қиялынан туған деп атады. Қылмыстық іске сәйкес, Перизат Қайрат пен оның анасы Ғайни Алашбаеваға қылмыстық кодекстің бірнеше бабы бойынша айып тағылған:
- 190-бабы 4-бөлігі 2-тармағы – "Аса ірі мөлшерде жасалған алаяқтық";
- 218-бабы 2-бөлігі 1-тармағы – "Алдын ала сөз байласу арқылы адамдар тобы жасаған қылмыстық жолмен алынған ақша мен басқа мүлікті заңдастыру (жылыстату)";
- 218-бабы 3-бөлігі 3-тармағы – "Аса ірі мөлшерде жасалған қылмыстық жолмен алынған ақша мен басқа мүлікті заңдастыру (жылыстату)".
"Айыптау актісіне келіспеймін, келтірілген уәждерді негізсіз деп санаймын. Тергеушілердің қиялы үшін мен жауапты емеспін. Бұл негізсіз айыптауды мойындамаймын. Сот бүгін басталды, алда барлық фактіні көрсетіп, өзімді қорғаймын", – деді Перизат Қайрат.
