АҚШ-тың Техас штатында болған жойқын су тасқынынан қаза тапқандар саны 130-ға жуықтады, — деп хабарлайды Massaget.kz тілшісі DW басылымына сілтеме жасап.
Жергілікті биліктің мәліметінше, апаттан кейін бір аптадан аса уақыт өтсе де, құрбандар саны кемінде 129 адамға жеткен. Тағы 166 адам хабар-ошарсыз кеткендер қатарында.
Табиғи апаттан ең қатты зардап шеккен Керр округінде 103 адам көз жұмған, олардың 36-сы — балалар. Көптеген адам әлі де табылмай жатыр.
Сонымен қатар, метеорологиялық қызмет 13 шілде кешіне дейін су тасқыны қаупін тудыруы мүмкін жаңа нөсер жауындар болатыны жөнінде ескерту жасады.
The Washington Post газетінің хабарлауынша, апат кезінде Керр округінің билігі қауіпті ескертетін, алыс қашықтыққа дейін сигнал тарататын арнайы жүйені іске қоспаған. Оның орнына SMS-хабарламалар тек осы қызметке тіркелген қолданушыларға ғана жіберілген.
Еске салайық, алапат су тасқыны 4 шілдеде таңертең Сан-Антониодан солтүстік-батысқа қарай 140 шақырым жерде болған. Қатты жауған жаңбыр салдарынан Гваделупе өзені тасып кеткен.
АҚШ медиасы бұл су тасқынын және жазғы лагерьден балалардың жоғалуын кейінгі жылдардағы ең ірі апаттардың бірі деп атап отыр.
Аптаның басты оқиғалары мен пайдалы видеоларды көру үшін YouTube арнамызға жазылыңыз
