Ақтауда кибералаяқтықтың алдын алу шаралары өтіп жатыр , деп хабарлайды 24kz.
Оқу-семинарға кез келген адам қатыса алады. Жобаны «Mangystau Hub» орталығы және отандық телекоммуникация компаниясының мамандары бірлесіп ұйымдастырды. Алдағы уақытта олар аудан-ауылды аралап, тұрғындарға ІТ сала бойынша сауат ашу курсын тегін өткізуді жоспарлап отыр.
Талғат Исламұлы, тілші:
- Мамандар көп жағдайда интернет-алаяқтың арбауына зейнет жастағы адамдар түседі дейді. Сол себепті аға буын өкілдерін оқытуға басымдық берілді. Дағыстан есімді Ақтау тұрғынына жуырда белгісіз біреу қоңырау шалған. Өзін банк қызметкерімін деп таныстыруынан күдіктенген зейнеткер дереу байланысты үзген.
Дағыстан Сарбөпеев, зейнеткер:
- Жолдасыма да, қызыма да, маған да телефоннан SMS-хабарлама келіп, жаңағыдай істеп жатады. Оны біз айырып тастаймыз. Адам түрін өзгертеді, дауысты өзгертеді. Адамдың алдаудың неше түрін дайындап қойыпты ғой бұлар. Енді Құдай сақтасын.
Әйгерім Мажтай, «Mangystau Hub» орталығының жетекшісі:
- Бұл семинардан алған білімді адамдар жеке деректерін сақтау мақсатында, жеке өмірінде қауіпсіздікті сақтау мақсатында қолдана алады. Және де алдағы уақытта бұл кибералаяқтардың алдын алу көмектеседі.
Биыл аймақта 189 адам интернет-алаяқтың арбауына түскен. Алаяқтар алдап алған қаржының жалпы сомасы 600 млн теңгеден асады. Өңірде қылмыстың осы түрімен киберполиция айналысады. Құқықорғаушылардың жедел іс-әрекетінің арқасында 110 млн теңге заңды иелеріне қайтарылды.
Айболат Мұрзашев, облыстық ПД Киберқылмысқа қарсы іс-қимыл басқармасының бастығы:
- 88 қылмыстық іс аяқталып, тиісті сот органдарына жолданды. Көбі қазір жәбірленушілердің тарапынан үлкен кісілер. Яғни, 45-тен жоғары санатты азамат және азаматшалар болып табылады. Бүгінгі таңда осындай фактілермен облыс көлемінде бірталай қылмыскерлер ұсталды. Былай айтсақ, дроп-дропботтар ұсталды.
Мамандар бейтаныс адамдардың нұсқауымен ешкімге ақша аудармауды ескертеді. Таныс емес номерден келген хабарламаны мұқият оқу керек. «Смс түріндегі хатта ғаламтор сілтемесіне өту керектігі жазылса, бірден бұғаттаған жөн», - дейді. Көпшілікке осы тектес нұсқаулар айтылатын танымдық семинар енді облыс көлемінде ұйымдастырылады.
Авторлары: Талғат Исламұлы, Саламат Бекбаев
