13 адамның өмірін жалмаған резонансқа толы сот процесі аяқталды.
Үкімді Алмалы аудандық сотының судьясы Ернар Қасымбеков шығарған, деп хабарлайды inbusiness.kz сайты.
Осылайша, бір жарым жылға созылған хостелдегі өртке қатысты іске нүкте қойылып отыр.
Іс Қылмыстық кодекстің 292-бабының 3-бөлігі (Абайсызда екі немесе одан да көп адамның өліміне әкеп
соққан өрт қауіпсіздігі талаптарын бұзу) бойынша қаралды.
Айып тағылған екі адам – ALA Hostel директоры Әділбек Мұхамедьяров пен "Гидсервис" компаниясының иесі Александр Пекельник.
– Сот барлық мән-жайды ескеріп, келесідей үкім шығарды: ALA Hostel директоры Әділбек Мұхамедьяров 5 жылға бас бостандығынан айырылды, Александр Пекельник 4 жылға сотталды. Олар жазасын қауіпсіздік деңгейі төмен мекемеде өтейді. Екеуі де сот залында қамауға алынды, – делінген хабарламада.
Айта кетейік, 2023 жылдың 30 қарашасында Әди Шәріпов 86 мекенжайында орналасқан "Almaty Hostel" хостелі өртеніп, 13 адам қайтыс болған еді. Кейіннен олардың төртеуі шетелдіктер (Ресей Федерациясының 2 азаматы және Өзбекстанның 2 азаматы) болса, қалғаны ел азаматтары екені белгілі болды.
