Бұл туралы Ауыл шаруашылығы министрі Айдарбек Сапаров мәлім етті, деп жазады inbusiness.kz сайты.
Қазақстанда қарасораны өндірістік мақсатта пайдалану жоспары қарастырылып жатыр.
Қазірге дейін өндіріс іске қосылған жоқ. Министрдің айтуынша, инвесторлар тиісті зерттеу жүргізіп, жер телімдерін қарастырып жатыр. Өндіріс технологиясы бекітілгеннен кейін нақты шешім қабылданады.
Ауыл шаруашылығы вице-министрі Азат Сұлтановтың айтуынша, қарасорадан алынатын өнімнің түрі көп – қағаздан бастап майға дейін жасауға болады. Алайда Қазақстанда тек техникалық қарасора өсіруге рұқсат етілгендіктен, оның құрамында есірткілік зат болмайды. Сондықтан басты назар жоғары деңгейде қорғалған қағаз өнімдеріне аударылмақ.
– Қарасорадан жасалған қағаз жеке куәлік, төлқұжат және банк құжаттары сияқты маңызды құжаттарға арналған. Бұл – экспорттық бағыттағы өнім болады, – деді Сұлтанов Үкімет отырысынан кейін өткен баспасөз мәслихатында.
Сондай-ақ вице-министр өндірісті Солтүстік Қазақстан облысында орналастыру мүмкіндігі қарастырылып жатқанын айтты.
