Биыл Ақмола облысындағы демалыс үйлері мен санаторийлерге жолдамалар 10-30%-ға дейін қымбаттады. Ал жаңғыртылған және қызмет түрлерін көбейткен нысандарда демалу бағасы тіпті 50 пайызға дейін өскен.
Өңірдегі туризм нысандары негізінен Бурабай мен Зерендіде. 700-ден аса нысанның көбі – қонақ үйлер мен шипажайлар. Туристерді орналастыру нысандарының саны жағынан Ақмола облысы еліміз бойынша Алматы қаласынан кейін екінші орында. Биыл олардың саны 374-ке жетіп отыр. Бұл былтырғыға қарағанда 24 нысанға көп. Ал туристік нысандарда демалу бағасы әр түрлі. Бұл көбінесе, демалыс нысанының орналасу орны мен инфрақұрылымына және көрсететін қызмет түрлеріне байланысты, – дейді туризм басқармасының маманы. Оны 3 сегментке бөліп қарастыруға болады.
Мәселен, эконом класстағы туристік нысандарда бір күндік орналасу бағасы 7 мың мен 15 мың теңге аралығында болса, орташа сегменттегі баға 15 мыңнан 40 мың теңгеге дейін барады. Ал жоғары сегменттегі люкс қонақ үйлер мен vip-курорттардағы бір күнгі демалыс құны 50 мың теңгеден жоғары тұрады.
Ерназар Құттығожин, Облыстық туризм басқармасының бөлім басшысы:
Былтырмен салыстырғанда 10-30 пайызға дейін бағалар өсті. Өйткені, елдегі инфляцияның салдары бар, бағалардың күрт өсуіне байланысты, мысалы азық-түлік бағасы өсіп жатыр, жанармайдың бағасы өсіп жатыр.
Бибінұр Әмірханқызы
