Командалық жарыс пен жекелей жарыста жеңіске жеткеннен кейін XDS Astana Team велошабандозы Евгений Фёдоров ұлттық чемпионаттың топтық жарысында да үздік атанды. Осылайша, Фёдоров биылғы Қазақстан чемпионатында үш бірдей алтын медаль жеңіп алып, өз мықтылығын тағы бір мәрте дәлелдеді.
Қазақстанда тас жолдағы велоспорттан Ұлттық чемпионат мәресіне жетті. Бір аптаға созылған бәсекенің шарықтау шегі ерлер арасындағы 210 шақырымдық топтық жарыс болды. Бұл жарыс шын мәнінде тек мықтылардың сынға түсер кезеңіне айналды. Қиын рельеф, күрделі бұрылыстар мен ауа райының қолайсыздығы спортшылардан төзімділік пен шеберлікті талап етті.
Биылғы чемпион – Евгений Фёдоров (Жетісу облысы). Ол жарыс бойы өзін сенімді ұстады, соңғы шақырымдарда жасаған шешуші шабуылы жеңіс әкелді. Тактикалық дәлдік, темпті ұстап тұру және жарысты дұрыс жоспарлау Фёдоровтың басты қаруы болды. Бұл оның топтық жарыстағы үшінші ұлттық чемпиондық атағы.
Күміс жүлдені Антон Кузьмин (Жетісу облысы) жеңіп алды. Ол командалық жұмыстың үздік үлгісін көрсетті. Кузьмин жарыс бойы тұрақты жүріп, шешуші сәттерде ұтымды әрекет етіп, екінші орынды иеленді.
Қола жүлде Даниил Марухинге (Солтүстік Қазақстан облысы) бұйырды. Жас әрі жігерлі спортшы мәре сызығына дейін көшбасшылар қатарында жүріп, жоғары дайындық пен амбициясын паш етті.
Жеңістен кейін Евгений жарыстың қалай өрбігені жайлы айтып берді:
- Бүгінгі жарысқа барынша дайындалып шықтым. Негізгі мақсат жеңіске жету болатын. Сол үшін алғашқы шақырымдардан бастап бар зейінімді салып, қарсыластардың барлық шабуылдары мен жекелеген әрекеттерін бақылап отырдым. Шынында, өте қиын жарыс болды. Бірнеше мәрте үздік үштік құралып, шабуылдар жиі жасалды. Бірақ жарыс жолының ортасына қарай мен көшбасшы топта болдым. Сол сәтте Антон Кузьмин шабуылға шықты, мен оның артынан ілесе шабуыл жасап, екеуіміз алға суырылып шықтық. Нәтижесінде жақсы басымдыққа ие болдық. Сол айырмашылық бізге жарысты жеңіспен аяқтауға жеткілікті болды, — деді Евгений.
Евгений Фёдоров бұл жеңістің жеке спорттық мансабындағы маңызын ерекше атап өтті:
- Қазақстан чемпионы атану — мен үшін үлкен мәртебе. Бұл жеңіс мені жігерлендіріп, келесі маңызды додаға сеніммен қарайтын күш берді. Енді мен "Тур де Франс" жарысына жол тартамын. Сол жерде Қазақстан чемпионының жейдесін лайықты деңгейде көрсету үшін барымды саламын, — деді велошабандоз.
Биылғы ұлттық біріншілік бірнеше күнге созылып, жекелей жарыс, командалық және топтық бәсекелерден тұрды. Елдің түкпір-түкпірінен келген 150-ден астам велоспортшы өз шеберліктерін сынады. Жарыс тәжірибелі спортшылар мен жас буын өкілдерінің бәсекелестігін үйлестіріп, үлкен спорттағы ауыс-түйістің табиғи үдерісін көрсетті.
