Ресей Федерациясы Үкіметінің қаулысына сәйкес, қазақстандықтар мен басқа да шетел азаматтары Ресейге бармас бұрын кемінде 72 сағат бұрын электронды өтінім беріп, QR-код алуы тиіс.

30 маусымнан бастап Ресейге визасыз режиммен кіретін шетелдіктерге талап күшейеді. Көрші елде жаңа пилоттық жоба іске қосылып, визасыз режиммен кіретін шетел азаматтары үшін талап өзгереді, деп жазады inbusiness.kz сайты.

Өтінімді жуырда әзірленген RuID қосымшасы арқылы беру керек. Сондай-ақ енді шекарадан өтерде биометриялық тексеру міндетті болады. Пилоттық жоба бастапқы кезеңде тек Мәскеу әуежайларында және Қазақстанмен шекарадағы Орынбор облысында орналасқан Маштаково автомобиль өткізу пунктінде іске аспақ. Бұл шектеудің дипломаттарға, алты жасқа дейінгі балаларға қатысы жоқ.

Өтініш беру үшін "ruID" қосымшасын орнатыңыз (қосымшалар дүкенінде 2025 жылғы 24 маусымға дейін қолжетімді) және тіркеліңіз. Егер сізде Ресейдің мемлекеттік қызметтер порталында аккаунтыңыз бар болса, онда "ruID" қосымшасына сол логин мен құпиясөз арқылы кіре аласыз.

Өтініште төмендегі ақпаратты көрсету міндетті:

  • қай елден шығасыз;
  • сапар мақсаты мен мерзімі;
  • Ресейдің қай өңірлеріне баруды жоспарлап отырсыз;
  • бірге саяхаттайтын жақындарыңыз туралы мәлімет (балалардың дерегін екі ата-ана да көрсетуі керек).

Қосымша арқылы биометриялық деректі тапсыруға болады, яғни бет фотосы, төлқұжат және дауыс жазу. Егер сіздің биометриялық деректеріңіз бұрын Ресейде тіркелген болса, онда өтінішті мемлекеттік қызметтер порталы арқылы да беруге болады, сапар туралы ақпаратты көрсетіп, бетіңіздің суретін жіберу жеткілікті. Шекарадан өткен кезде сіз қосымшада көрсеткен жеке басыңызды куәландыратын құжатты көрсету жеткілікті.

Ресейге кіргеннен кейін 10 күн ішінде Бірыңғай биометриялық жүйеде (ББЖ) биометриялық тіркеуді аяқтау қажет, ол үшін жеке басыңызды куәландыратын құжаттармен банк бөлімшесіне баруыңыз керек. Сондай-ақ, Ресей аумағында орналасқан қызмет көрсету орталығына немесе ХҚКО-ға (МФЦ) барып, Мемлекеттік қызметтер порталындағы аккаунтыңызды растау ұсынылады.

Бұл арқылы сіз:

  • барлық қолжетімді мемлекеттік онлайн қызметті пайдалана аласыз;
  • ресейлік SIM-карта ала аласыз;
  • айыппұлды, салық берешектерін және мемлекеттік бажды төлей аласыз.

– Назар аударыңыз, визалық режиммен, оның ішінде бірыңғай электрондық виза арқылы Ресейге кіру тәртібі өзгеріссіз қалады, – деп ескертеді елшілік.