Ақтөбеде жарылыс болған үйдің бір подъезі тұруға жарамсыз болып шықты. Бүгін шаһар басшылығы жүргізілген сараптама жұмыстарының қорытындысын жариялады.
Естеріңізде болса, осыдан екі апта бұрын қаладағы көпқабатты үйлердің бірінің төртінші қабатында жарылыс болып, бір адам қаза тапқан еді. Салдарынан қабаттар арасындағы бетон блоктар құлаған. Тұрғындар уақытша жатақханаға орналастырылды. Әзірге жарылысқа нақты не себеп болғаны белгісіз. Өйткені, сараптама жұмыстары жүргізілгендіктен оқиға орнын толық барлау мүмкін болмаған. Мамандардың айтуынша, бұл пәтерлер жөндеуге келмейді, яғни бір подьезд толықтай апатты деп танылды. Сондықтан бұзылып, қайта салынады.
Арсен Қабылғалимов, «ҚазИнжинирингЦентр» ЖШС бас инженері:
Төртінші және алтыншы подъездер қатты бүлінбеген. Тек ұсақ жарықшақтар ғана бар. Үйдің басқа бөлігі зақымданбаған. Құрылыс жұмыстарының қанша уақытқа созылатыны жобалық-сметалық құжаттарды дайындау мерзімі мен жұмыс көлеміне байланысты.
Құрылыс бір жылға созылуы мүмкін. Жұмыстар аяқталғанға дейін жарылыс болған бесінші және оған жапсарлас тұрған алтыншы, төртінші подъездердің тұрғындары да уақытша әкімдік балансындағы пәтерлерге көшіріледі. Өйткені конструкциялық бекіту жұмыстары жүргізіледі. 45 отбасының әрқайсысына 100 айлық есептік көрсеткіш көлемінде бір реттік көмек беріледі. Сондай-ақ балалардың өздері қалаған мектепте білім алуына да жағдай жасалады.
Азамат Бекет, қала әкімі:
45 пәтерде 83 тұрғын бар. Есет батыр ықшам ауданына көшкен жағдайда білім бөлімімен толық жағдай жасалады. Яғни уақытша сол ықшам ауданда орналасқан мектептерге ауыстыруға болады балаларды.
Жақсыбек Кемал
