Мемлекеттік ақпараттық жүйелерден дербес деректердің таралуы немесе хакерлік шабуылдар нәтижесінде бұзылуы тіркелген жоқ.
2025 жылғы 16 маусым қарсаңында интернетте 16 миллионнан астам Қазақстан азаматының деректері әшкереленді деген ақпарат пайда болды. Осыған байланысты ҚР Цифрлық даму, инновациялар және аэроғарыш өнеркәсібі министрлігі мәлімдеме жасады.
Мәліметтердің сыртқа шығуы туралы SecuriXy.kz Telegram арнасының мамандары хабарлады. Айтуларынша, олар "Қазақстан резиденттері 2024" деген ақпараттың ағып кетуі туралы мұрағатқа талдау жасаған.
"16,3 миллион жолды қамтитын қазақстандықтардың жеке деректері бар CSV файлы табылды. Кестеде келесі жолдар бар: тегі, аты, әкесінің аты, жынысы, туған күні, идентификатор, ЖСН, ұялы телефон, жұмыс, үй, азаматтығы, ұлты, мекенжайы, расталған мекенжайы, тұрғылықты жерінің басталу және аяқталу күні", – делінген хабарламада.
Цифрлық даму министрлігінің баспасөз қызметі ведомствоның азаматтардың жеке деректерінің сыртқа шығуы туралы онлайн-режимде тараған ақпаратты зерттеп жатқанын мәлімдеді.
"ҚР ЦДИАӨМ Ақпараттық қауіпсіздік комитеті құқық қорғау және арнайы органдармен бірлесіп, ұсынылған мәліметтердің шынайылығы мен өзектілігін анықтау мақсатында кешенді тексеру жүргізіп жатыр. Алғашқы талдау бұл деректердің мемлекеттік емес, яғни жекеменшік ақпараттық жүйелерден алынуы мүмкін екенін көрсетіп отыр. Бүгінгі таңда мемлекеттік ақпараттық жүйелерден дербес деректердің таралуы немесе хакерлік шабуылдар нәтижесінде бұзылуы тіркелген жоқ", – делінген хабарламада.
Оқи отырыңыз: Біз Қазақстанның орнықты дамуындағы сенімді әріптеспіз – АИИБ директоры
Сонымен қатар департамент "тергеу аяқталғанға дейін түпкілікті қорытынды жасау немесе ақпараттың растығын растау әлі ерте" деп мәлімдеді.
Егер азаматтың дербес деректері тараған мәліметтер арасында болса, ол туралы электрондық үкімет порталы (eGov) арқылы жеке кабинетіне хабарлама жолданады, делінген хабарламада.
Министрлік жағдайды жіті бақылауда ұстап отыр. Қосымша ақпарат тексеру нәтижелері бойынша жарияланады.
