Қазақстанның еңбек нарығын ауқымды жаңғырту күтіп тұр. Қазірдің өзінде заманауи экономиканың талаптарына жауап беретін сегіз жаңа кәсіп енгізу жоспарланды. Олардың ішінде 3D басып шығару инженерлері мен роботты бояу жүйелерінің операторлары бар, деп хабарлайды Egemen.kz.
Жаңа мамандықтар пилоттық негізде Алматы мен Қостанайда енгізіледі. Сонымен қатар жасанды интеллект технологияларын пайдаланумен 60 кәсіби стандарт әзірленіп жатыр. Олар экономиканың негізгі салаларында, соның ішінде машина жасауда 336 кәсіпті қамтиды. 2024-2026 жылдарға арналған ұзақ мерзімді жоспарға сәйкес, барлығы 1371 кәсіпті қамтитын 250 кәсіби стандарт әзірленетін болады.
Қазір инженерлік-техникалық персоналдың біліктілігін арттыру үшін шетелдік кәсіпорындарда тағылымдамадан өтудің инновациялық бағдарламасы енгізіліп жатыр. Оның ерекшелігі – бірлескен қаржыландыру тетігі арқылы шығыстар республикалық бюджет пен кәсіпорындар арасында тең бөлінеді. Яғни мамандардың озық халықаралық тәжірибені қабылдап, өз өнеркәсібіміздің ерекшеліктеріне тиімді бейімделуге көмектесетін бұл тәсіл бойынша шетелде оқыту ақысының 50%-ын мемлекет төлесе, қалғаны кәсіпорын қаражаты есебінен жабылады.
Білікті кадрларды даярлау мәселелерінде химия өнеркәсібі де басымдыққа ие болды. Химия саласындағы кадр тапшылығын кешенді шешу үшін жетекші жоғары оқу орындарында – Satbayev University, ҚазҰУ, ҚазҰТЗУ, сондай-ақ Тараз химия-технологиялық колледжі секілді бейінді оқу орындарында мемлекеттік білім беру гранттары едәуір кеңейтілді. 536 колледжде дуальды білім беру бағдарламалары енгізілді. Бұл бастамалардың түпкі мақсаты – өндірістік кәсіпорындармен тығыз серіктестікті жолға қойып, студенттердің өндірістік тәжірибеден өтуіне, содан кейін нақты жұмысқа орналасуына жағдай жасау. Бірқатар кәсіпорындар өздерінің болашақ мамандарын оқытуды толығымен өз мойнына алған. «Болашақ» халықаралық бағдарламасы және шетелдік оқу орындарымен тікелей әріптестік өндірісті автоматтандыруды, химиялық қауіпсіздікті және экологиялық мониторингті қоса алғанда, жоғары технологиялық бағыттар үшін инженерлік кадрларды даярлауды қамтамасыз етеді.
Сол секілді жастар арасында геолог мамандығының танымалдығын арттыру да маңызды. Бұл мақсаттағы жұмыстардың елеулі нәтижесін тиісті деректерден көреміз: егер 2022 жылы геологиялық мамандық бойынша 1224 түлек диплом алса, 2024 жылға қарай олардың саны 3000-нан астқан. Сәтбаев техникалық университетінің мәліметінше, түлектердің 98%-ы оқыған мамандығы бойынша жұмысқа орналасады.
Осындай жүйелі шаралардың жаңа кәсіби буынды қалыптастырып, ел экономикасын технологиялық жаңғырту, халықаралық нарықта бәсекеге қабілеттілікті арттыру міндеттерін табысты шешуге септігін тигізеріне сенім мол.
