Премьер-министр Олжас Бектенов IV Ташкент инвестициялық форумына қатысты. Пленарлық отырыста сөйлеген сөзінде инвестиция тарту экономиканы дамытудың негізгі факторы екенін атап өтті.
Елімізде инвесторларға салықтық жеңілдіктер жасалып, кедендік баждардан босатылады, заттай гранттар, икемді әрі жекелеген преференциялар беріледі. Ірі инвесторлармен басым салалардағы жобаларды жүзеге асыруға 25 жылға дейін заңнамалық тұрақтылықты қамтамасыз ететін Инвестициялар туралы келісімдер жасалады.
«Жақында өткен Астана экономикалық форумында Президент Қасым-Жомарт Тоқаев еліміздің Орталық Азияның тұрақтылығы берік, ынтымағы бекем, болашағы айқын болғанын қалайтынын ерекше атап өтті. Үкіметіміз өзара сенім мен орнықты даму рухында табысты және ұзақмерзімді жобалар құруға дайын. Инвестиция тарту – өңірдің экономикалық парадигмасының негізгі факторы. Қазақстан 2029 жылға қарай экономикаға кемінде 150 млрд доллар көлемінде шетелдік капитал ағынын қамтамасыз етуді мақсат етіп отыр. Осы арқылы ауқымды әрі барынша биік мақсаттар қойылып, оған қол жеткізуге әбден болады. Ол үшін ұлттық экономиканы құрылымдық қайта құруға бағытталған ауқымды реформалар табанды түрде жүргізіліп жатыр», деді О. Бектенов.
Дайын инфрақұрылыммен жабдықталған, сондай-ақ салықтық әрі кедендік жеңілдіктер беретін арнайы экономикалық және индустриялық аймақтар жұмыс істейді. «Астана» халықаралық қаржы орталығында бизнесті жүргізуге бірегей жағдай жасалған. Базасында ағылшын құқығы юрисдикциясының болуы заңды рәсімдердің ашықтығына кепілдік береді.
Сонымен қатар Олжас Бектенов сауда-инвестициялық ынтымақтастықты кеңейту, энергетика мен логистикадағы өңірлік әріптестікті тереңдету, маңызды пайдалы қазбалар саласын дамыту, сондай-ақ цифрландыру және орнықты өсуді қамтамасыз ету мәселелеріне назар аударды.
Энергетика саласында трансшекаралық жобаларды бірлесіп іске асыру, «жасыл» энергияны өндіру мен беру үдерісін қоса алғанда, өңір елдері арасындағы ынтымақтастықтың басым бағыттары аталды. Сондай-ақ көлік-логистикалық инфрақұрылымды дамытуға, атап айтқанда, Транскаспий халықаралық көлік бағыты шеңберінде ірі инвестициялық жобаларды жүзеге асыруға назар аударылды.
Цифрлық инфрақұрылымды трансформациялау аса маңызды салаларға, оның ішінде деректер орталықтарын, трансұлттық талшықты-оптикалық желілер тарту, суперкомпьютерлік қуаттарды және жасанды интеллект экожүйесін дамытуды қоса алғанда, ұзақмерзімді инвестициялар тарту қажеттігі атап өтілді.
Өзбекстан Республикасының Президенті Шавкат Мирзиёевтің қатысуымен өткен пленарлық отырыста тұрақты даму, инвестициялар және өңірлік әріптестік стратегиялары талқыланды. Форумда Болгария Президенті Румен Радев, Словакия Премьер-министрі Роберт Фицо, Әзербайжан Премьер-министрі Али Асадов, Қырғызстан Министрлер кабинетінің төрағасы Адылбек Қасымалиев, Тәжікстан Премьер-министрі Кохир Расулзода, Түрікменстан Министрлер кабинеті төрағасының орынбасары Нокергулы Атағұлыев, Ресей Федерациясы Үкіметі төрағасының орынбасары Александр Новак, Еуропа қайта құру және даму банкінің президенті Одиль Рено-Бассо, БРИКС елдері банкінің президенті Дилма Руссефф сөз сөйледі. Сонымен қатар іс-шараға премьер-министрлер, халықаралық ұйымдардың, жаһандық корпорациялар мен қаржы институттарының өкілдері қатысты.
Форумға қатысушылар бүкіл өңірдің инвестициялық тартымдылығын арттыру үшін Орталық Азия елдерінің күш-жігерін үйлестірудің маңыздылығын атап өтті. Форум аясында Өзбекстан Республикасының Президенті Шавкат Мирзиёев Қазақстан Республикасының Премьер-министрі Олжас Бектеновті қабылдады. Ол Қазақстан Республикасының Президенті Қасым-Жомарт Тоқаевтың құттықтауы мен ізгі тілегін жеткізді. Кездесу барысында сауда-экономикалық, көлік-логистикалық, өнеркәсіптік, су-энергетикалық, мәдени-гуманитарлық ынтымақтастық мәселелері қаралды.
Өзбекстан – Қазақстанның маңызды сауда серіктесі. Биылғы төрт ай қорытындысында тауар айналымы өткен жылдың сәйкес кезеңімен салыстырғанда 9,4%-ға артып, 1,3 млрд доллар құрады. Экспорт 15,9%-ға өсіп, 1 млрд долларға жетті. Негізгі қозғаушы күш өнеркәсіп, автомобиль әрі ауыл шаруашылығы салаларындағы кооперация болды.
