Чилилік боксшы Даниэла Асенхо (17-5-3, 2 КО) мен оның жаттықтырушысы Алехандро Конча Қазақстанда өткен жекпе-жекте жергілікті спортшы Ангелина Лукастан (15-1, 8 КО) жеңілуге мәжбүр болғанын мәлімдеді, деп хабарлайды Skifnews.kz ақпарат порталы 1bol.kz-ке сілтеме жасап.
1 маусым күні Таразда Лукас пен Асенхо арасында IBO тұжырымы бойынша екінші жеңіл салмақта әлем чемпионы атағы үшін реванш өтті. Жекпе-жек жетінші раундқа жетпей аяқталды: Асенхо бел омыртқасындағы жарақатына байланысты айқасты әрі қарай жалғастырудан бас тартты.
Алайда Grupo DiarioSur басылымына берген сұхбатында Алехандро Конча мәселенің жарақатқа қатысы жоқтығын алға тартты. Жекпе-жектен бес күн өткен соң Даниэла мен оның бапкері Чилидегі Grupo DiarioSur басылымына сұхбат беріп, жеңілістің басы себебін атады.
Сөзінше, олар 28 мамырда Чилиден ұшып шығып, 30 мамырда Таразға жеткен. Ұшу бағыты Сан-Паулу (Бразилия) мен Ыстамбұл (Түркия) арқылы өткен, соңғы нүктеде кідіріс болған соң, ұйымдастырушылар оларды Қазақстанға Өзбекстан арқылы әкелуді ұсынған. Ұйымдастырушылар боксшыларды Өзбекстаннан күтіп алып, Қазақстан шекарасы арқылы көлікпен Таразға жеткізген. Шекара-ақ олар «қонақжайлылық» жоқтығын байқапты. Алты сағаттық сапардан кейін Таразға бір күнге кешігіп жеткен.
Кончаның пікірінше, мұндай маршрут оларды әбден қажытып, ауа райына бейімделіп үлгермес үшін әдейі таңдалған. Одан бөлек қонақ үйге жеткен соң қоқан-лоқы көрсетілгенін алға тартты.
«Демалып, уақыт айырмашылығына бейімделуге тырысып жатқанбыз, кенеттен бөлмемізге турнирдің әзербайжандық промоутері келіп, жекпе-жек үшін сыйақының бір бөлігін берді. Тура гангстерлік фильмдегідей, жүйкесі сыр беріп тұрғандай көрінді. Сол күйде долларды төсектің үстіне тастай салды. Сонан соң аударма қосымшасы арқылы «Асенхо бүгін жеңбейді», – деді.
Ең қорқыныштысы бұл емес. «Егер ол жеңсе, менің өміріме қауіп төнеді. Басымды кесіп тастайды. Ал сіздер Қазақстаннан шыға алмайсыздар» деген жазуды көрсетті, — деді маман.
Бапкердің сөзінше, Конча бұл хабарламаны телефонында сақтап қойған.
«Жеңіске жеткен жағдайда елден шыға алмайтынымызды естігенде, не ойларымызды білмей қалдық. «Табытпен жібере ме екен, әлде із-түзсіз жоғалып кетеміз бе деп қорықтық. Себебі қайтар билеттеріміз де болмаған», — деді Конча.
Олардың айтуына қарағанда, жекпе-жек алдында да күмәнді жағдайлар болған. Ережелер түсіндірілген кезде Асенхоның қолғаптары әлі ашылмаған екен, ал қарсыласының қолғаптары ашық тұрған. Даниэла Лукастың қолғаптарын киіп көруді сұрағанда, оған рұқсат берілмеген. Сондай-ақ оның бапкеріне қарсыластың тейптерін тексеруге мүмкіндік берілмеген.
«Өміріне қауіптенген Асенхо шаршы алаңда қарқынын әдейі төмендетті. Әйтпесе жойқын соққы жасайтын сәттері болды. Себебі біздің бар ойымыз елімізге аман-есен оралу болды. Жекпе-жектің тезірек аяқталып, тезірек Чилиге оралсақ екен дедік», — дейді Конча.
Асенхо мен Конча IBO ұйымына ресми шағым жолдаған. Ұйым Лукасқа қарсы тағы бір жекпе-жек өткізуді ұсынғанымен, чилиліктер бас тартқан.
«Біз мұндай адамдармен іс жүргізгіміз келмейді», — деп қосты Асенхо.
