Бүгін судья Ержан Жанұзақов айыпталушыларға сот үкімін оқыды.
Сот отырысынан соң сотталушылар мен олардың ата-аналары, туыстары үкімге қарсы шығып, жанжал туындатты, деп хабарлайды inbusiness.kz сайты.
Шерзат Полаттың әпкесі Перизат Нұрымова сотталушылардың еш өкінбей тұрғанын айтып отыр. Әрі олар Шерзаттың отбасы мен адвокаттарына қоқан-лоққы жасап та үлгерген.
– Қазіргі уақытта сот біткен күннің өзінде ата-аналары да бізге атылып, сотталушылар да терезені ұрып, қоқан-лоққы көрсетіп, "бізді шықпайды деп ойлайсыңдар ма?" дейді. Болашақта кім болса да, қандай жағдайда да ата-ана бала-шағасын уайымдайды. Мынандай жағдай болмасын, ешкімнің бауырына, баласына өлім тілемейсің. Бірақ, мына кісілер әлі күнге дейін ешқандай жазаны мойындап тұрған жоқ, істеген нәрсені уайымдап тұрған жоқ. Өкініш те жоқ. Бұлардың бізге қарап күліп тұрғаны өкінішті білдірмейді деп ойлаймын. Тікелей біздің өмірімізге қоқан-лоққы жасауда. Біздің қорғаушыларымыға да сол нәрсені жасап тұр, – дейді Перизат Нұрымова.
Ал сотталушылардың туысы істің әділ өтпегенін айтады. Оның сөзінше, Қаржаубай Нұрымовтың өзі қылмыстық іске тартылуы керек.
– Нұрымов Қаржаубайға қылмыстық іс қозғалсын! Осы істі бастаған сол. Өйткені, балалар барған кезде балаларды да жинаған, Шерзатқа мылтықты да әкелгізген. Қазір сөз бостандығы бар Қазақстанда. Төбелесті Қаржаубай бастаған, ұйымдастырған. Айналып келгенде, отқа май құйған – Қаржаубай. Ол мықты болса, неге сотқа қатыспады? Тығылып үйінде отыр, онлайн қатысып. Таза болмағаннан кейін қатыспады қашып, – деді сотталушылардың бірінің туысы.
Бұған дейін сотталғандардың отбасы сот залында шу шығарғанын жазған едік.
