Бүгінгі кездесуде жеңіске жеткен қазақстандық теннисші әлемдік рейтингте бірден 13 саты жоғарылады.
Бүгін Париждің топырақ төсенішті корттарында қазақстандық теннис сүйер қауым үшін ерекше күн болды. Александр Бублик мансабындағы жаңа белесті бағындырып, тұңғыш рет "Ролан Гаррос" турнирінің 1/8 финалына шықты.
Үшінші айналымда Бубликке қарсы жас, бірақ мықты теннисшілердің бірі Энрике Роша (Португалия) шықты. Алайда бұл кездесуде тәжірибе мен шеберлік өз жемісін берді. Қазақстандық теннисші екі сағатқа жуық уақытта қарсыласын еш қиындықсыз 7:5, 6:1, 6:2 есебімен жеңді.
Алғашқы сетте біраз тартыс байқалғанымен, Бублик шешуші сәттерде суырылып алға шықты. Екінші және үшінші сеттерде қазақстандық спортшы толық басымдық танытып, ойын тізгінін қолынан шығарған жоқ. Ол әдеттегідей креативті соққыларымен, ойын мәнерімен жанкүйерлерін тәнті етті.
Енді Бублик кем дегенде 265 000 еуро көлемінде сыйақы алады. Сонымен қатар, ол ATP live-рейтингінде 13 саты жоғарылап, 49-орынға көтерілді. Бұл көрсеткіш оны ТОП-50 қатарында нық тұрақтауға мүмкіндік береді.
1/8 финалда Александрды нағыз сынақ күтіп тұр. Ол әлемнің 5-ракеткасы, Ұлыбритания өкілі Джейк Дрейпермен кортқа шығады.
Ертең Елена Рыбакина да орталық кортқа шығып, Ига Швёнтекпен шеберлік байқасады.
Ал, Юлия Путинцева 18 жасар Мирра Андрееваға 6:3, 6:1 есебімен жол беріп, Ролан Гарростағы өнерін аяқтады.
