Дүниежүзілік бокс федерациясы (World Boxing) өз турнирлеріне қатысатын барлық боксшыға жынысты анықтау тестілеуін міндетті түрде өтуі керек деген талап қойды, деп хабарлайды Skifnews.kz ақпарат порталы.
2024 жылғы Олимпиада чемпионы, алжирлік Иман Хелиф бұл тестілеуден өтпейінше, федерация аясындағы жарыстарға қатыса алмайды.
«World Boxing ережелері мен процедуралары бойынша жынысқа қатысты генетикалық скринингтен өтпейінше, Иман Хелиф 2025 жылдың 5-10 маусымы аралығында өтетін әйелдер арасындағы «Эйндховен Box Cup» турниріне және World Boxing ұйымының кез келген іс-шарасына қатыса алмайды», — делінген федерацияның мәлімдемесінде.
ПЦР-тест – бұл зертханалық әдіс, белгілі бір генетикалық материалды, атап айтқанда, SRY генін, яғни биологиялық жынысты анықтайтын Y-хромосоманың бар-жоғын анықтау тәсілі. Яғни Париж Олимпиадасының чемпионы Иман Хелиф те дәл осы тестілеуден өтуі керек.
2023 жылы IBA (Халықаралық бокс қауымдастығы) Хелифті Үндістанда өткен әлем чемпионатынан жыныстық сәйкестік талаптарына сай келмегені үшін шеттеткен еді. Гендерлік тестілеу нәтижесі оның ХY хромосомалары бар екенін көрсетті. Сол жылы Халықаралық олимпиада комитетінің (ХОК) сессиясы IBA-ді олимпиадалық қозғалыстан шығарып, кейін алжирлік спортшыға Олимпиадаға қатысуға рұқсат берді. Нәтижесінде Хелиф Париждегі Олимпиада ойындарында алтын медаль жеңіп алды.
Айта кетейік, Геннадий Головкин World Boxing Олимпиадалық комиссиясының төрағасы. Дәл осы аңыз спортшының арқасында бокс 2028 жылы АҚШ-тың Лос-Анджелес қаласында өтетін Олимпиада бағдарламасына енгізілді.
