Қазақтың бас ақыны А.Құнанбайұлының 180 жылдығы аясында Абай облысы әкімдігінің қолдауымен өткен «Абай әндері» атты республикалық дәстүрлі әншілер байқауының жеңімпаздары анықталды.
Хакім Абайдың ән мұрасын насихаттауға бағытталған байқауға еліміздің түкпір-түкпірінен дарынды жастар қатысып, бақтарын сынады. Өнерпаздар өнерін Рамазан Стамғазиев, Толғанбай Сембаев, Гүлмира Сарина, Ардақ Исатаева, Қайрат Қабышев, Еркін Шүкіман, Сержан Мұсайынов сынды елімізге белгілі әншілер бағалады.
Биыл алғаш ұйымдастырылған «Абай әндері» байқауының бас жүлдегері ұлы ақын атын алған облыстың талантты өнерпазы Таңат Мұқашев болды. Бірінші орын Абай облысынан қатысқан Сәулет Аманғазинға бұйырды. Екінші орын иегерлері – Жаңабай Ақжол (Алматы облысы) және Әсем Әбдіғани (Шымкент қаласы). Ал үшінші орынды Абдуррахман Естайұлы, Өмірзақ Шешханұлы және Құрманғазы Нұрғабыл (Алматы қаласы) бөлісті. Байқау барысында ерекше өнер көрсеткен орындаушыларға арнайы аталымдар бойынша құрмет көрсетілді. Әлмағамбет Қапсәләмұлы атындағы арнайы жүлдеге Ұлытау облысының өкілі Фархад Жәкіш лайық деп танылды. Шәкір Әбенов атындағы арнайы жүлде Астана қаласынан келген Таңшолпан Бағдатқызына берілді. Шәкәрім Құдайбердіұлы атындағы арнайы жүлде Алматы қаласының өнерпазы Алтынбек Тұрғамбаевқа табысталды. Сонымен бірге Аида Срайл (Алматы қаласы), Іңкәр Нүптеке (Астана қаласы) және Нұртуған Абылайұлы (Алматы қаласы) байқаудың дипломанттары атанды.
Абайдың музыкалық мұрасын дәріптеуге арналған байқау жыл сайын дәстүрлі түрде өтеді деп жоспарланып отыр.
Абай облысы
