Қоғамдық маңызы бар, мерекелік және мерейтойлық күндер – ел тарихының айнасы іспетті. Бұл күндер халықтың өмірінде ерекше орын алып, ұлттың мәдениеті мен дәстүрін ұлықтауға мүмкіндік береді .
Мәселен, Наурыз мейрамы, Тәуелсіздік күні, Республика күні, Конституция күні, Жеңіс күні сияқты мерекелер тек демалыс уақыты емес, халықтың тарихи санасын жаңғыртатын, елге деген сүйіспеншілікті арттыратын мерекелер.
Осындай мерекелер халықтың жүрегіне қуаныш сыйлап қана қоймай, елдің тұтастығы мен татулығын бекемдей түседі.
Осы тұрғыда Жамбыл атындағы қазақ мемлекеттік академиялық филармониясында Б. Байқадамов атындағы мемлекеттік хор капелласының көркемдік жетекшісі және бас дирижёры, Қазақстан республикасының мәдениет қайраткері, «Құрмет», «Парасат» орденінің иегері Демеуов Бейімбет Кеңесбайұлымен kaz.caravan.kz медиа порталының тілшісі сұхбаттасты.
—Ағай, қазіргі таңда жастар ұлттық мерекелерге қаншалықты қызығады деп ойлайсыз?
-Қазіргі жастардың ұлттық мерекелерге деген қызығушылығы жыл сайын артып келеді деп ойлаймын. Жастар дәстүр мен заманауилықты қатар ұстануға тырысады. Мысалы, Наурыз мерекесін қазіргі буын тек дәстүрлі ойындар мен салттар арқылы емес, жаңа форматтағы фестивальдер, этношоу, флешмобтар арқылы атап өтуді жөн көреді.
Олар ұлттық киім киіп, әлеуметтік желілерде өз мәдениетін таныстырып, дәстүрдің мән-маңызын өзгелерге жеткізуге тырысады. Бұл — рухани жаңғырудың нақты көрінісі.
Болашақта жастарымыз ұлтық мерекелерді мақтан тұтатын болады.
-Сіз үшін ең ерекше, рухани әсер қалдыратын мереке жайлы айтсаңыз?
-Мен үшін рухани әсер қалдыратын мереке — Тәуелсіздік күні. Ел есінде мәңгі сақталып қалатын желтоқсан оқиғасы.
1986 жылдың 16 желтоқсан оқиғаларының куәсі болмасам да, сонау Украина елінде әскер қатарында жүрген кезімде елдегі оқиғаны сезіндім.
-Мерекелік концерттерде халықтың көңіл күйі мен патриоттық сезімін ояту үшін қандай шығармалар таңдалады?
-Әрине таңдалатын шығармалар мерекелік концерт — қойылымдардың концепциясына, қоюшы режиссёрдің жеке талғамына, көркемдік бағытына сай келуі керек.
Ең бастысы — Қазақтың халық әндері, Қазақстан композиторларының патриоттық деңгейі жоғары шығармалары орындалу керек.
-Осындай мерекелік шараларда, мерейтойларда еліміздің барлық қаласында болған шығарсыздар. Одан бөлек шет мемлекеттерге бардыңыздар ма?
-Әрине, түрлі мерекелерде еліміздің барлық қалаларында болдық.
Ал, өзге елдерді атап айтар болсам, Үнді елінің Мумбай қаласында, АҚШ-тың астанасы Вашингтон қаласында, Нью-йоркта, Қытайдың Пекин, Щеньян қалаларында, Түркияның астанасы Анкарада, Венгрияның астанасы Будапешт қаласында және Ташкентте де өнер көрсетіп келдік.
-Сіз басқаратын Хор капелласының репертуарында мерейтойлық немесе тарихи тақырыптағы қандай ерекше туындылар бар?
-Б.Байқадамов атындағы Мемлекеттік Хор Капелласының репертуарында 1500 асатын туындылар бар. А.Жұбанов, Ғ.Жұбанова, Е.Рахмадиев,М.Сағатов, М.Манғытаев, Д.Ботбаев, Б.Жұманиязов, Т.Қажғалиев, Б.Дәлденбаев, Қ.Шілдебаев, А.Тоқсанбаев, Б.Қадырбекова, С.Әбдінұров т.б. , осы аталған композиторлардың туындылары бәрі ерекше, жоғарғы кәсіби деңгейде жасалған.
