Бүгін Астана Халықаралық форумы аясында «Италия – Қазақстан» іскерлік кездесуі басталды. Шамамен 8 млрд АҚШ долларына келісімдер жасау көзделіп отыр. Екі ел арасындағы сауда және логистика саласын дамытуға бағытталған жиында қандай мәселелер талқыланып жатыр?
Ақниет Балтанова, тілші:
Форум Қазақстан мен Италия арасындағы жеткізу, логистика маршруттарын оңтайландырып, сауда және инвестициялық байланысты нығайтуды талқылайтын маңызды алаң болып отыр. Жиынға екі елдің мемлекеттік орган қызметкерлері, бизнес өкілдері мен сарапшылары жиналды. Қазір екі жақты пікірталастар, бизнес-кейстер алмасу сынды талқылаулар жүріп жатыр.
Айта кету керек, былтыр дәл осындай іскерлік кездесу Италияның Милан қаласында ұйымдастырылды. Сол кезде Қазақстаннан 50-ден аса ауыл шаруашылығы, мұнай-газ, тоқыма, туризм, ІТ саласындағы компаниялары барған еді. Бұл бастама екі елдің шағын және орта бизнесінің дамуына серпін берді. Өйткені Қазақстандық өнімдерді Еуропа нарығына шығаруға мүмкіндік артты. Сондай-ақ, денсаулық сақтау, авиация, энергетика бағытында 8 келісімге қол қойылды. Нәтижесінде, Италиямен бірлесіп, авиаотын өндіру қарқын алды. Астана мен Милан арасында тікелей әуе рейсін ашу шешімі де осы форум аясында қол жеткізген келісім болды.
Ақниет Балтанова, тілші:
Спикеріміз айтып өткендей, бүгін 8 млрд АҚШ доллары көлемінде келісімдер жасау көзделіп отыр. Шара Астана халықаралық форумы аясында өтіп жатқандықтан 30 мамырға дейін жалғасады. Нақты қандай келіссөздер жүргізілгенін Ақпараттың келесі санында толықтырамын.
Ақниет Балтанова
