Әлемде 30 бен 79 жас аралығындағы әрбір үшінші адам гипертониямен ауырады.

АҚШ-тың Нортвестерн университетінің ғалымдары жүргізген жаңа зерттеу бала кезде артериялық қысымы жоғары болған жандардың есейгенде жүрек-қан тамыры ауруларына шалдығу көрсеткіші жоғары болатынын көрсетті.

"Біз жоғары қан қысымы бала кезден басталса да, оның ондаған жылдардан кейін денсаулыққа айтарлықтай кері әсер ететінін анықтадық. Балалардағы гипертония немесе жоғары артериялық қан қысымы елу жыл ішінде өлім қаупін 40-50 пайызға арттыруы мүмкін", – деді Нортвестерн университетінің Файнберг медицина мектебінің доценті доктор Алекса Фридман.

Б9л зерттеу 1959-1965 жылдар аралығында АҚШ-та жүргізілген ең ірі жобалардың бірі. Оған 38 мыңнан астам бала қатысқан. 7 жастағы балалардың қан қысымы өлшеніп, бұл деректер кейін Өлген адамдардың ұлттық базасымен салыстырылған. Кардиолог ғалымдар жобаға қатысқан жандарды 2016 жылға дейін бақылаған. Олардың арасында 2837 өлім тіркелсе, оның 504-і жүрек-қан тамырлары ауруларымен байланысты болған.

Зерттеу нәтижелері тіпті қан қысымының аздаған жоғарылығы да болашақта инфаркт пен инсультке әкелетін өлім қаупін арттыратынын көрсетті. Систолалық қысымның жоғарылауы өлім қаупін 13%-ға, ал диастолалық қысым 18%-ға арттырған.

Дүниежүзілік денсаулық сақтау ұйымының мәліметінше, бүгінде әлемде 1,28 миллиард ересек адам гипертониямен ауырады. Бұл – 30 бен 79 жас аралығындағы әрбір үшінші адам. Қазақстанда артериялық гипертензия жас адамдардың 23%-ында кездеседі. Сәйкесінше, еліміздегі әрбір төртінші бала мен жасөспірімнің болашақта жүрек-қан тамырлары ауруларына шалдығу қаупі жоғары.

"Артериялық гипертония – біз ойлағаннан да ертерек басталатын қауіпті фактор. Адамның жас кезінің өзінде қысымның сәл ғана жоғары болуы тамырлар мен жүрекке жылдар бойы әсер етеді. Сол себепті де салауатты өмір салтын бала кезден қалыптастыру маңызды. Дұрыс тамақтану, белсенді қимыл-қозғалыс, тұзды аз тұтыну, ұйқыны реттеу және күйзелісті басқару – жүрек аурулары мен инсульттің алдын алудың ең тиімді жолдары, – дейді дәрігер, Ұлттық "Денсаулық" қауымдастығының басшысы Бақыт Түменова.

Оқи отырыңыз:

  • Жүрек сыр бергенде, қандай жаттығулар жасаған жөн? Кардиолог кеңестері
  • "Жүрек ауруына шалдығуды 21 пайыз арттырады". Трансмайларды тұтынудың қаупі қандай