Астанада блогер Ерболат Жанәбіловтің жұбайы Эльмира Төлегеноваға қатысты сот процесі өтіп жатыр. Сотта Туризм және спорт министрлігінің Ойын бизнесін реттеу комитетінің өкілі сөйледі, — деп хабарлайды Massaget .kz тілшісі.
Эльмира Төлегенова не үшін айыпталып отыр?
Эльмира Төлегенова әкімшілік құқықбұзушылық жасады, яғни оператор болмаса да, лотерея ұйымдастырды деп айыпталып отыр. Комитет өкілі Балтегі Әбделдің сөзінше, блогердің дәлелдері сынға төтеп бере алмайды.
Корпоративтік парақшаның орнына жеке парақша
Комитет өкілінің айтуынша, ұтыс ойындары корпоративтік ресурстар арқылы емес, Төлегенованың жеке парақшасында өткізілгені де заңбұзушылықты көрсетеді. Сондай-ақ, сыйлықтар қалай берілгені де дау тудырған.
"Азамат Төлегенова жеке парақшасында Kaspi Gold шоты арқылы ақша береді. Kaspi Gold жеке тұлғаларға беріледі, ал заңды тұлғалар үшін басқа қаржы платформалары қарастырылған. Бұл ретте азамат Төлегенова мен Zhana Business ЖШС арасында қандай да бір құқықтық қатынастар жоқ", — деп толықтырды комитет өкілі.
Сондай-ақ, судья комитет өкілінен азаматтардан қанша өтініш түскенін нақтылады.
"Біз 2025 жылғы 26 тамызда хаттама толтырғаннан кейін E-otinish платформасы арқылы азаматтардан осындай іс-шараларды тексеру үшін Төлегенова мен оның жұбайы Жанәбіловке қатысты тағы сегіз өтініш түсті", — деді ол.
Дау қалай өрбіді?
Бұған дейін блогерлер Instagram-да 11 көлік ойнатылатынын жариялаған болатын. Шарты қарапайым көрінген, репост жасау ғана. Алайда 21 тамызда оқырмандар тікелей эфирдің орнына құны 30 мың теңге тұратын Zhana Business ақылы курсының сілтемесін көрген. Конкурсқа тек курсты сатып алғаннан кейін қатысуға мүмкіндік берілетіні белгілі болды. Бұл жұрт арасында наразылық тудырды.
Кейінірек Жанәбіловтер ұйымдастырған даулы конкурс сотқа жетті.
Аптаның басты оқиғалары мен пайдалы видеоларды көру үшін YouTube арнамызға жазылыңыз
