Ең аяғы инемен тігіс тігіп, жіп те сабақтап береді . Тіпті көңіліңізді аулап ән салып, домбыра тартады. Сөйтіп, ғылым мен өнер тоғысқан тұста роботтар тек көмекші емес, ұлттық мұраға үн қоса бастады.
Жасанды интеллект жаңа күй туындыларын дүниеге әкелетін сәт те алыс емес тәрізді. Алдағы уақытта роботтар тағы қандай қырынан танылмақ?
Бүгінгі роботтар тек темір-терсектен тұратын құрылғы емес, мәдениет пен ғылымға да жанаса бастады. Бірі хирургияда адамның қолы жетпейтін дәлдікті көрсетсе, бірі музыкалық аспапта шебер ойнайды. Тіпті робот құрастыратын роботтар да бар. Жақында Илон Маск ұқыптылықты талап ететін шаруаны роботқа әбден тапсыруға болатынын көрсетті. Ол ойлап тапқан Optimus гуманоидының басты ерекшелігі – дәлдік пен ептілікте. Жалпы құлтемірлер күнделікті өмірімізге соншалықты ене қоймаған. Ал Optimus қоғамның толыққанды мүшесіне айналмақ.
Хуан Цзявей, Unitree Robotics компаниясының маркетинг директоры:
- Құлтемірлердің қимылдары жетіліп жатыр. Біздің өнімдеріміздің көбі қазірдің өзінде туннельдерді тексеру мен өрт сөндіру сынды адам үшін қауіпті орталарда жұмыс істейді. Болашақта гуманоид роботтар осындай жоғары қауіпті жұмысты өздігінше атқарып, адамдарды қатерден қорғауға мүмкіндік береді.
Ал бүгінгі күннің соңғы жаңалығы сезіну қабілетінде. Робо-құрылғылар енді заттың бедері мен пішінін саусақ ұшымен сезе алады. Құлтемірдің сезіну түйсігі Amazon жүк қоймасында пайдаға асты. Vulcan атты робот компанияның бірнеше елдегі қоймаларында жүкті реттеп, тасып жүр. Ал болашақта өнертапқыштар тағы немен таңғалдырмақ, уақыттың еншісінде.
Роботтар енді жеке дара техника емес, тұтас бір қоғамға айналып барады. Олар үшін арнайы ойындар, халықаралық көрмелер мен фестивальдер ұйымдастырылады. Олар тіпті футбол ойнайды, боксқа қатысады. Тіпті бет әлпеті адамнан аумайтын роботтар бар. Осы қарқынмен олар өз мәдениеті қалыптасқан қауымдастыққа айналуы да ғажап емес.
Авторы: Әйгерім Ардаққызы
