АҚШ-тағы психиатрлар ерекше клиникалық жағдайды тіркеді. 36 жастағы әйел бірнеше апта бойы кіржуғыш ұнтақты жеп жүргенін мойындады. Оны ұнтақтың иісі мен құрамы қызықтырған. Алайда ол ауруханаға мүлде басқа шағымдармен түскен, — деп хабарлайды Massaget.kz тілшісі "Доктор Питерге" сілтеме жасап.
Кейде ағзадағы темір тапшылығы ерекше белгілер арқылы байқалады. Мәселен, кейбір адамдар үнемі мұз жегісі келіп тұрады. Ал кейде адамның бор, құм, қағаз, шаш, саз, топырақ сияқты мүлдем жеуге келмейтін заттарға әуестігі оянады. Бұл құбылыс "пикацизм" деп аталады. Әдетте психикалық ауытқуларға байланысты дамиды, бірақ кейде басқа себептерден де болады.
Мичиган штатындағы клиникаға түскен әйел ентігуге, әлсіздікке, сол жақ қабырға астындағы ауырсынуға шағымданған. Оның семіздігі және мазасыздық, депрессия сынды психикалық бұзылыстары болған. Талдау нәтижесі бойынша, әйелде В12 дәруменінің тапшылығынан дамыған макроцитарлық анемия анықталды. Ол қан құйдыру мен қарқынды терапияға жіберілді.
Кейін әйелдің ерекше әдеті белгілі болды: ол бір айдан аса уақыт бойы ағартқыш ұнтақты аузына жеп жүрген. Алдымен оны ұнтақтың иісі қызықтырса, кейін құрамы да тарта бастаған. Ол саусағын сілекейлеп, ұнтаққа малып, дәмін татқан. Ұнтақты жұтпай, кейін түкіріп, аузын шайып отырған.
Қосымша тексерістер әйелдің ағзасында "ішкі фактор" деп аталатын ақуызға қарсы антиденелер барын көрсетті. Бұл ақуыз В12 дәруменін сіңіру үшін қажет. Дәл осы ақау дәрумен тапшылығына, анемияға және пикацизмге себеп болған.
Дәрігерлер оған жоғары дозада В12 дәруменін тағайындап, ем жүргізді. Әйел емделген соң ауруханадан шыққан. Бірақ оның кіржуғыш ұнтаққа деген әуестігі басылып-басылмағаны белгісіз.
Анықтама: Макроцитарлық анемия көбіне В12 дәруменінің сіңбеуінен туындайды. Бұған ішек пен ұйқыбез аурулары, кей дәрілерді ұзақ қолдану немесе ет жемеу әсер етуі мүмкін.
Қызықты жаңалықтар мен видеоларды көру үшін TikTok арнамызға жазылыңыз!
