Ел экономикасының дамуы үшін тер төгіп жүрген мамандардың еңбегі ерен.
Мұнайды бұрғылаудан бастап, оны өңдейтін, дайын өнімді халыққа жеткізумен айналысатын қызметкерлер қандай құрметке де лайық.
Асқар Ермышев 30 жылдан астам осы зауытта еңбек етеді. Әскерден келгеннен кейін оператордың көмекшісі болып орналасқан ол, қазір мұнай өңдеу өндірісінің бастығы. Оның ата-анасы да осы зауыттың өркендеуіне үлес қосқан. Әке жолын жалғаған Асқар Рысбайұлы зауыттың жүрегі саналатын өндірісте абыройлы қызмет атқарып жүр.
Асқар Ермышев, Мұнай өңдеу және терең күкіртсіздендіру өндірісінің бастығы:
- Біз мұнайды өңдейміз. Мұнайдан шығаратын бензин, керосин, мазут фракцияларды шығарамыз да, оны «вторичный установка» бөліміне жібереміз. Одан бензин АИ-92, 95, 98, сосын жазғы, қысқы дизель отынын шығарады. Бәрі Еуро-4, Еуро-5 класстан шығарады. Менікі дайындап беру.
Асқар Ермышев өзінен кейінгі жастарға жөн сілтеп, бағыт беріп отырады. Өзі де білікті мамандардан тәлім алғаннан кейін білгенін үйретуден жалыққан емес. Әр қызметкермен етене араласып, табысты еңбек етудің жолын көрсетіп келеді.
Бауыржан Бекешов, Мұнай өңдеу және терең күкіртсіздендіру өндірісі бастығының орынбасары:
- Осы зауытта көптен бері жұмыс атқарып келе жатқан маман. Бірге жұмыс істеп келе жатқанымызға 20 жылдан асты. Өте жақсы тәлімгер. Көп жұмысты сол кісінің арқасында үйрендім. Әлі күнге дейін бірге жұмыс істеп келе жатырмыз. Қазіргі уақытта мен орынбасары болып жұмыс атқарамын.
Ұрпақ сабақтастығын бұзбаған әулеттің үшінші буыны да қазір осы зауытта жұмыс істейді. Асқар Ермышевтың қызы Камила инженер-технолог боп еңбек етуде. Ел экономикасының өркендеуіне елеулі үлес қосып жүрген жандар қашанда құрметке лайық.
Асланбек Шығыр, Айбек Байзақов, Жандос Рахметуллин, 24KZ
