Оңтүстік Кореяның бұрынғы президенті Юн Сок Ёльдің жұбайы Ким Кон Хи-ге жемқорлық және пара алу деректері бойынша ресми айып тағылды, деп хабарлайды Egemen.kz Yonhap агенттігіне сілтеме жасап.
Естеріңізге сала кетейік, Юн Сок Ёльдің өзі де қазіргі таңда тергеу изоляторында отыр. Оған әскери төтенше жағдай енгізуге талпынысы үшін айып тағылған. Биыл сәуір айында оған импичмент жарияланып, ол президенттік қызметінен шеттетілген болатын.
Арнайы прокурор Мин Джун Ки-дің айтуынша, Ким Кон Хи капитал нарығы, саяси қорлар туралы заңдарды бұзып, делдалдық үшін пара алған.
Тергеу мәліметіне сәйкес, ол 2009–2012 жылдары акциялармен манипуляция жасау схемасын қаржыландырып, 2022 жылғы президенттік сайлау алдында күйеуімен бірге «ықпалды брокерден» тегін социологиялық сауалнамалар алған. Бұған жауап ретінде ол экс-депутат Ким Ён Сунның кезектен тыс парламент сайлауына түсуіне қолдау көрсеткен деп айыпталған.
Сонымен қатар Ким Кон Хи 2022 жылы Бірігу шіркеуінен іскерлік қызметтер үшін шаман арқылы қымбат сыйлықтар алған деген күдікке ілінген.
Айып ресми түрде оның алдын ала қамау мерзімі аяқталуына екі күн қалғанда тағылған. Осыған байланысты ол тағы алты айға дейін қамауда қалуы мүмкін. Егер жаңа айыптар анықталса, қамау мерзімі ұзартылуы ықтимал.
Ким Кон Хи қамауға алынғаннан бері бес рет тергеушілерге жеткізілгенімен, көбіне өзін-өзі айыптамау құқығын пайдаланып келген. Қазір тергеу жалғасып жатыр. Оған зергерлік бұйымдарды беріп, мемлекеттік қызметке тағайындаулар немесе іскерлік жеңілдіктер алған деген күдікке ілінген адамдардың үйлерінде тінту жүргізіліп жатыр.
Еске сала кетейік, қазіргі таңда Оңтүстік Корея президенті – Ли Чжэ Мён. Ол биыл 3 маусымда өткен кезектен тыс сайлауда жеңіске жеткеннен кейін мемлекет басшысы болып сайланды. Бұған дейін, Юн Сок Ёль қызметінен кеткен соң, елді уақытша премьер-министр Хан Док Су басқарған еді. Ол кейін отставкаға кетіп, орнына жаңа премьер-министр болып Ким Мин Сок тағайындалды.
