Астанада қосымша білім беру ұйымдары енді ваучерлік жүйе арқылы қаржыландырылады.
Ол үшін бірыңғай платформа іске қосылады. Ал кезек 12 санат бойынша қалыптасып, әр балаға бір ваучер беріледі. Жаңа әдіс салада ашықтықты қамтамасыз етеді, дейді мамандар.
Ваучерлік жүйеге қатысты ата-аналарды сан түрлі сауал мазалап жатыр. Біз қазір Оқушылар сарайындамыз. Мұнда консультациялық орталық жұмыс істеп тұр. Мамандар ата-аналарға кеңес беріп жатыр. Қалада дәл осындай 6 орталық жұмыс істейді. Мадияр Аманбайұлы Алматы ауданына жақында ғана көшіп келген. Спортпен шұғылданатын үлдары үшін жақын жерден секция іздеп жүр. Дегенмен құжат тапсыру бұрынғыдай болмай шықты. Кезек алу үшін енді бірыңғай базаның іске қосылғанын күту қажет.
Мадияр Аманбайұлы, қала тұрғыны:
- Жазылайық дегенбіз секциялар болса балаларға. Жүзуге, сосын футболға кіші баламды, үлкен баламды боксқа. Балаларымның таңдауына қарай. Әлі толық түсінген жоқпын. Енді қарап жатырмыз. Өткен жылы алған кезде ешқандай қиыншылықтар болмаған.
Қалада бұрын білім, өнер және спорт бағыттары бойынша 3 түрлі платформа жұмыс істеп, 3 түрлі кезек қалыптасатын. Онда қайталанған өтінімдер жиі кездеседі. Сәйкесінше бір бала бірнеше үйірмеге қатысып, өзгесіне орын жетпей қалатын. Енді әр оқушыға бір ваучер ғана беріледі. Ата-аналар қосымша.кз сайтына өтініш беру қажет. Онда кезек 12 санат бойынша қалыптасады.
Дидар Байтасов, Балаларға қосымша білім беру оқу-әдістемелік орталығы басшысының міндетін атқарушы:
- Әрбір категория бойынша коэффициент беріледі. Осы коэффициент бойынша осал топтағы отбасылардың балалары тезірек ваучер алуға мүмкіндігі болады. Бір ваучермен кез келген салаға қатыса алады. Өзі таңдайды баланың қажеттілігіне байланысты және қатысып жүріп, басқа салаға ауысатын болса, кез келген уақытта ауысып кете алады.
Мемлекет тарапынан ваучерлік әдіспен қаржыландырылатын үйрмелер мен секциялардың 200-ден астам түрі бекітілді. Оның жартысынан көбі білім, қалғаны шығармашылық пен спортқа қатысты. Былтыр Әл-Фараби атындағы Оқушылар сарайының өзінде 13 мыңдай бала қамтылған. Мекеме жаңа оқу жылынан бастап ваучерлік жүйеге көшуге дайындалып жатыр.
Айгүл Әйтімова, әл-Фараби атындағы оқушылар сарайы директорының орынбасары:
- Ваучерлік жүйе балалардың арасында қосымша білім беру саласына бөлінетін орындарды әділетті түрде үлестіруге мүмкіндік береді. Сондықтан біз де осы жүйеге дайындықтарымызды жасап жатырмыз. Мекемелер арасында да, педагогтар арасында да дұрыс бәсеке қалыптасады. Өйткені олар сапаға жұмыс істейтін болады.
Тағы бір ерекшелігі — мекемелерге төленетін қаражат көлемі баланың үйірме немесе секцияға қатысқан нақты күндеріне байланысты болады. Ол үшін ата-аналар платформадағы жеке кабинетіне кіріп, табелге қол қоюы тиіс. Осы арқылы мемлекет қаражаты үнемделеді, — дейді мамандар.
Еркебұлан Смадияров, Қанат Махмұтов, 24kz
