Жыл басынан бері елімізде шетел әншілерінің қатысуымен 270-тен астам концерт өткен екен. Қонақтарды тартудың бұл бағыты «оқиғалы туризм» деп аталады. Себебі танымал шетел жұлдыздары өнер көрсететін концертке еліміздің әр аймағынан, сондай-ақ көршілес елдерден де көрермен көптеп келетіні белгілі.

Кейінгі жылдары елі­міз­де халықаралық дең­гейдегі мәдени іс-шаралар жиі өтетін болды. Мысалы, жақында әлемге әйгілі «Backstreet Boys» тобының елімізге келетіні туралы хабар тарады. Бұл оқиға мәдени туризм мен креативті индустрияны дамытуға серпін беруге тиіс. Әрі еліміздің беде­лін арттырып, жаңашыл құн­дылықтарды қолдайтын мемлекет ретінде танылуына ықпал етеді. Демек оқиғалы туризм – ел брен­дін, ұлттың мәдени мұрасын әспеттеп көрсетудің тиімді жолы. Мұндай іс-шараларға әдетте мәде­ниет, бизнес өкілдері, волон­тер­лер, жастар жиі тартылады. Мәде­ниет және ақпарат министр­лігі Мәдениет комитеті төраға­сы­­ның орынбасары Азамат Бел­қа­йыров баспасөз конференция­сында «Backstreet Boys» тобының кон­­церті жеке инвестиция есе­бі­нен ұйымдастырылатынын мәлім етті.

«Жобаны жеке ұйымдас­ты­ру­шы­лар іске асырады. Мемлекеттік бюджеттен қаражат бөлінбеген. Алайда Мәдениет және ақпарат министрлігі ықылас танытып, ақ­па­раттық қолдау көрсетіп отыр. Атап айтқанда, мәдени жобаларды үйлестіру, ақпараттық сүйе­мелдеу, мемлекеттік жергілікті атқарушы органдармен өзара келісім қамтамасыз етіліп жатыр. Бұл – мемлекет пен бизнестің тиімді ынтымақтастығының нақты үлгісі. Концерт жай ғана шоу емес, еліміздің жаңа мәдени келбе­тін қалыптастыруға бағытталған маңызды қадам. Мұндай бастамаларды қолдай отырып, елімізді мәдени, туристік бағыт ретінде әлемге таныта бергіміз келеді. Бұл министрлік іске асырып отырған ауқымды жұмыстың бір бағыты ғана», деді А.Белқайыров.

Ұлттық статистика бюросы­ның мәліметінше, былтыр елордаға 1,5 млн турист келген. Оның 350 мыңы – шетелдік қонақтар. Биыл шамамен 1,7 млн турист келеді деген болжам бар. Әзірге бірінші тоқсанда елордаға 300 мың қонақ келсе, оның 68 мыңы – шетелдіктер. Бүгінде елорда саяси, іскерлік орта­лық қана емес, мәдени іс-шара­лар жиі өтетін қалаға айналды. Астана қалалық туризмді дамы­ту орталығының басшысы Артём Квашуктың айтуынша, «Backstreet Boys» тобының кон­церті сияқты ауқымды іс-шара­­ларды өткізу қалаға бірінші кезек­те төлем қабілеті жоғары турис­терді тартады. Әрі халық­ара­лық аренада Астана қаласына деген қызығушылықты арттырады. Концерт күні қонақүйлер толып, мейрамханаларда, мәдени ны­сан­­дарда, көрікті жерлерде адам үзіл­мей­ді. Бір концерттің өзі бірнеше бағыттың дамуына серпін береді.

«Қаланың инфрақұрылымы кез келген деңгейдегі іс-шараны өткі­­­зуге дайын. Мұнда 300-ге жуық қонақүй бар. Оның 9-ы – 5 жұл­дызды, 100-ден астамы – 3-4 жұл­дызды. Жыл өткен сайын Астана «Оқиғалар қаласы» мәрте­бесін нығайтып келеді. Был­тыр 128 халықаралық іс-ша­ра өтті. Биыл 200-ден астам іс-шара ұйым­дастырылмақ», деді А.Ква­шук.

Батыс Еуропада 10 мың адамға арналған концерт орта есеп­пен шағын және орта бизнес нысандарына 1 млн доллар­дан астам қосымша табыс әкеледі екен. Бұл дегеніңіз – қонақүй бизнесін дамытуға ниетті инвес­тор­ларға үлкен белгі. Қорыта келе, «Backstreet Boys» тобы 21 қыркүйекте Астанада алғаш рет өнер көрсететінін хабарлаймыз. Билеттер 14 шілдеден сатылымға шығады.