Астанада Перизат Қайратқа қатысты қылмыстық іс бойынша сот тергеуі жалғасып жатыр. Прокурор Мәдина Оразалина айыптау актісін оқыды, — деп хабарлайды Massaget.kz тілшісі.
Мемлекеттік айыптаушының айтуынша, 2018 жылдың қарашасында Halyk қайырымдылық қоры әлеуметтік жобаларды өтеусіз қаржыландыруға арналған birgemiz.kz интернет-платформасын іске қосқан. Аталған платформа "Біз біргеміз" ұранымен коронавирус инфекциясымен күресте халыққа көмек көрсету кезінде кең танымалдылыққа ие болды".
"Перизат Қайрат "Біз біргеміз" акциясының кең қолдауға ие екенін біле отырып, азаматтар мен заңды тұлғалар қайырымдылық көмек ретінде аударған ақшаны алдау және сенімді теріс пайдалану арқылы жымқыруға бағытталған қылмыстық ниетпен әрекет еткен. Қайрат Перизат әзірлеген қылмыстық жоспар – халық арасында танымал болған "Біз біргеміз" ұранын пайдаланып, қоғамдық бірлестік құру болған", – деді Оразалина сотта айыптау актісін оқып.
Сондай-ақ, мемлекеттік айыптаушының айтуынша, Перизат Қайрат қоғамдық бірлестік атынан өзінің және анасы Ғайни Алашбаеваның атына банк шоттарын ашқан.
"Қайраттың қылмыстық жоспарының тағы бір бөлігі – әлеуметтік қолдауға және материалдық көмекке мұқтаж адамдарды іздеу, түрлі іс-шаралар мен аукциондар ұйымдастыру арқылы бей-жай қарамайтын азаматтардан қайырымдылық ретінде ақша тарту, әлеуметтік желілерде төтенше жағдайлардан, табиғи апаттардан, соғыстар мен апаттардан зардап шеккендерге гуманитарлық және материалдық көмек көрсету үшін қаражат жинауға үндеу жариялау", – деп жалғастырды прокурор.
Айыптау нұсқасына сәйкес, Перизат Қайрат:
- қоғам алдында өзіне оң имидж қалыптастырып, жиналған қаражаттың бір бөлігін қайырымдылық көмек ретінде таратып, қылмыстық әрекеттерінің ізін жасыруға тырысқан;
- қайырымдылық ретінде жиналған ақшаны иемденіп алған;
- қылмыстық жолмен алынған табысты туыстары мен сенімді адамдарды тарта отырып заңдастырған;
- қаражатты қолма-қол ақшаға айналдырып, олардың қылмыстық шығу тегін жасыруға тырысқан;
- заңдастырылған ақшаны жеке материалдық пайда табу мақсатында пайдаланған;
- табыс көзі мен материалдық игіліктердің қайдан шыққанын жасыру үшін өзін және анасын табысты, жеткілікті кәсіпкерлер ретінде көрсеткен.
2021 жылғы 11 қазанда Biz Birgemiz Qazaqstan 2030 бірлестігі мен оның жарғысы тіркелген. Жарғыда көрсетілген мақсаттар – қайырымдылықпен айналысу, волонтёрлік қызметті дамыту, волонтёрлерді біріктіру, сондай-ақ мәдени, патриоттық және құқықтық іс-шаралар өткізу.
Еске салайық, бұған дейін алаяқтық бойынша және қылмыстық жолмен алынған ақшаны заңдастырды деген күдікке ілінген Перизат Қайрат тергеу изоляторында соққыға жығылғанын мәлімдеді. Оған азаматтар мен ұйымдардан жиналған 3 миллиард теңгеден аса қаржыны жымқырды деген айып тағылған болатын.
9 шілдеде таңертең Астана сотында Перизат Қайратқа қатысты алдын ала тыңдау өтті. Сот Перизат Кайрат пен оның анасы қатысқан соттың кейбір бөлімдерін жабық жүргізу туралы шешім шығарған болатын. Бұл шешім конфиденциалды ақпаратты (соның ішінде банктік құпияны) сақтау мақсатында қабылданған еді.
Қызықты жаңалықтар мен видеоларды көру үшін TikTok арнамызға жазылыңыз!
