Ақмола облысындағы туристік елді мекен саналатын Зеренді ауылында жергілікті ауқымдағы табиғи сипаттағы төтенше жағдай жарияланды. Оған ауылдың іргесіндегі көлдің арнасынан асып, жиегіндегі үйлерді су басуы себеп болып отыр. Оқиға орнынан әріптесім Бибінұр Әмірханқызы мәселенің мән-жайын айтып береді. Бибінұр, биыл қанша үйге су кірді?
Бибінұр Әмірханқызы, тілші:
Су басу қаупі жоғары аймақта 17 үй бар. Қазір біз Зеренді көліне жақын орналасқан Мусин көшесінде тұрмыз. Жалпы, соңғы бірнеше жыл көлемінде су айдыны еріген қар суынан толығып, арнасынан асуда. Ғалымдар тұйық көлдің осылай толығуы 40-50 жылда бір қайталанатын табиғи жағдай деп түсіндіреді. Тұрғындар болса, көлдің суы үйімізге кірді деп шағымдануда. Салдарынан көл жиегіндегі үйлердің қабырғалары сызданып, көгеріп кеткен. Әзірге сыздан құлауға жақындаған екі баспана ғана апатты деп танылды. Жалпы, су қорғау аймағында орналасқан бұл көше 2021 жылғы ауылдың бас жоспарында жоқ болып шықты. Яғни өткен ғасырдың 70-80 жылдары бой көтерген бұл үйлер бастапқыда-ақ Су кодексі талаптарына сай салынбаған. Соңғы екі жылда көлдің жағалауын нығайтуға 13 млн теңге жұмсалды. Алайда бұл ешқандай нәтиже бермеген соң, Зеренді ауданының төтенше жағдайлардың алдын алу және жою жөніндегі комиссиясының кезектен тыс жедел отырысында төтенше жағдай жариялау туралы шешім қабылданды. Бұл 17 үйдің тұрғындарын қауіпсіз аумаққа көшіруге мүмкіндік береді. Қазір менің жанымда Зеренді ауданы әкімінің орынбасары Серік Исаханов мырза тұр.
Бибінұр Әмірханқызы, тілші:
Зеренді көлінің өзіне келсек, тұрғындардың көліміз бұрынғыдай емес, ластанып, батпақтанып келеді деген шағымдары орынды,-дейді мемлекеттік табиғи парктің мамандары. Себебі Су кодексі талаптарына сай көл жиегінен 500 метрге дейінгі аймақта ешқандай құрылыс болмауы тиіс. Осы талаптар бұзылғандықтан, ауылдан келген сарқын сулардың көлге құйылу қаупі бар. Бүгінде Экология департаменті судың тазалығына байланысты зерттеу жүргізіп, санитарлық нормаға сай деген шешім шығарды. Алайда сарқын су әрі қарай аға берсе, көлден айырыламыз,-дейді мамандар. Себебі Зеренді көлі тұйық су айдындарына жатады.
Бибінұр Әмірханқызы
